響應「發呆」街頭變「蠟像」 古巨基定格5分鐘嚇跌媽咪
為響應「全城挑戰發呆1分鐘」，古巨基化身蠟像「時光基」突襲鬧市玩發呆，更擺出高難度動作，任人影、亂摸亂掂，搞到腰骨都梗！愈玩愈高興的基仔又打親民牌，搭巴士與乘客玩「基遇」，似在車廂舉行小型聚會。
最近全城掀起「發呆」熱，古巨基也接受挑戰，前日穿上白色重型皮褸突襲銅鑼灣鬧市，化身發呆「時光基」站在其演唱會巨型海報前，吸引大批途人駐足圍觀，有市民充滿疑惑問：「係咪真人嚟？」、「佢唔答我」、「佢都唔眨眼」，有小朋友戰戰兢兢埋身掂基仔手臂，更多途人當正基仔是景點，拎出手機跟他自拍，最搞笑有女士出手篤基仔條腰笑說：「我唧你會唔會笑？」基仔十足「假人」一樣完全冇郁動，直至有女童由媽媽帶住走到基仔面前自拍，基仔突然「嘩」一聲，把女童媽媽嚇到O嘴仆落地，非常爆笑！
紓緩緊張情緒
基仔發完呆後，就被途人捕獲合照，有位準新娘子對基仔說：「我明日結婚，好開心見到你。」又有嬸嬸老實不客氣捽他面珠，問到基仔是否鍾意發呆？他笑說：「古太就最鍾意發呆。」他自爆是應側田邀請參與「全城挑戰發呆1分鐘」，他指都市人每日都處於緊張情緒，要有適當的紓緩，呼籲大家關心情緒的健康，並笑說：「我一係唔玩，一係就做好玩啲、得意啲嘅嘢，我特登換番影演唱會海報件衫嚟，扮番騎住時光機個甫士。」挑戰成功的基仔「呆」足5分鐘，自爆有途人笑他像蠟像館的蠟像，由於他要模仿海報上的甫士，所以難度很高：「要彎住身，兩隻手要凌空，原來係好攰，做完我條腰梗咗，因為唔可以眨眼，所以對眼好澀。」隨即清唱：「眼睛不能沒眼淚，個口不能流口水。」非常抵死。
搭巴士玩「基遇」
基仔玩得興起，再即興搭巴士與乘客玩「基遇」，身上有八達通的他拎住張50元紙幣在巴士站找人兌換硬幣，之後跳上巴士的基仔笑說：「嘩，冷氣巴士正！」因為巴士滿座，基仔只得「企位」，但乘客見到他出現，開心得拎起手機不停影，基仔亦主動跟乘客合照留念，他又搞笑問車廂內一位太太：「架車經唔經紅館？」太太就耐心教他何處落車再轉車，不過，因趕住工作，基仔搭了幾個站就落車。之前試過執導並在巴士上拍攝的他笑說：「咁做嘢梗係低調啲，着到咁行搭巴士就第一次！」
文：音樂組