借分手谷個唱？ 劉浩龍：咁肉酸

藝人劉浩龍（師兄）、鄧月平、吳浩康及樓南光等，昨日到九展出席ViuTV新劇《VR驅魔人》記者會。與容祖兒五年情告一段落的師兄，在人前表現開心，在台上被樓南光追問感情生活時，師兄笑說：「同你感情幾好呀。（其他人呢？）梗係好，大家都睇ViuTV。（感情係講一個人呀！）一個人梗係對我媽媽啦。」

「呢個半月好辛苦」

師兄接受訪問時被問感情狀況有否變化？他說：「上年同今年嘅目的都係要做好工作，唔好話我宣傳，嚟緊四月就開騷。都見我瘦咗好多，呢個半月好辛苦，每日操兩個幾鐘又要練歌，發夢都諗起食嘢，精神壓力好大，想大家覺得我係一個歌手。（分手傳聞令你分心？）真係好少睇，要減肥冇飯食好容易影響心情、好容易忟，唔睇啲令到我有壓力嘅新聞。（祖兒有冇短訊打氣？）真係冇咩人Message我。」

祖兒與師兄口徑一致，未有正面回答是否已分手。	鄧月平於新劇以美少女戰士及良家婦女等多個造型演出。	樓南光追問劉浩龍的感情狀況。

「最緊要努力工作」

問到是否與祖兒分手？他與祖兒口徑一致迴避說：「呢個環境大家都好支持大家，最緊要係努力工作，暫時唔想講感情生活，希望大家專注睇到我嘅努力，感情就唔回應。（冷靜緊？）大家仲好互相支持大家，佢好我開心，我好佢都開心。（夾過口供？）冇，大家有自己嘅思想、感受。（祖兒嚟睇騷？）好多朋友都會嚟，不過擔心唔夠飛，驚冇位。（冇預祖兒？）朋友都有預，但係真係買唔到咁多飛。」師兄又指近期心情很正面，但因要節食，有時會睡不着，個半月減了24磅，希望再減多10磅。

對於被網民質疑借「分訊」谷個唱，師兄說：「我可以百分百話畀大家聽唔會，最近做咗三十幾個訪問盡力宣傳，呢樣嘢喺呢個年代冇乜用，我唔會做啲咁肉酸嘅嘢，會靠自己努力。（祖兒老闆楊受成曾經話希望愛錫祖兒嘅人唔好有目的。）唔回應。」

文：影視組