基仔撩袁文傑鬥舞
歌手古巨基昨日到上環為音樂特輯《初生再體驗》拍外景，並請來唐詩詠及森美再拍一次經典歌曲《愛與誠》MV，自己則做小配角，基仔說：「詩詠2004年同2007年都幫過我拍MV，事隔多年佢已經成為視后，好犀利，感激佢幫手！」他表示特輯會重現多年來在TVB做過的事，例如再入讀訓練班、客串劇集《開心速遞》做路人甲、主持《娛樂新聞眼》及《勁歌金曲》。
「亂入」TVB節目
對於再一次經歷往事，他感觸良多：「好多嘢好難忘，估唔到有導演仲Keep住《娛樂新聞眼》個咪牌，我做番小記者，不過就冇留番以前個冬菇頭。（參與咁多節目，TVB好抵喎！）哈哈哈！我覺得好得意，可以亂入做唔同節目。」他又指袁文傑是其訓練班同學，當年兩人舞技最差，打算邀請對方上跳舞堂一決高下：「我跳過咁多場演唱會，舞技進步咗好多，唔知阿傑有冇進步喇！」
森美玩謝唐詩詠
而森美則透露MV中跟詩詠情深對望，但由於不用現場收音，他趁機大整蠱：「我係咁話要打巴你，梗係要Check吓視后嘅演技啦！」詩詠提議加入餵食戲，森美笑說：「搞到我好緊張，對上一次餵我嘅係阿媽，所以我當詩詠係我契媽o架喇！」又大爆MV中基仔對他有HeHe情感，詩詠即笑他在HeHe界非常出名，森美笑說：「我坐的士，司機都叫我坐上嚟！」
文：影視組