黃智雯清場晒背齋益袁偉豪
最近憑新劇人氣急升的黃智雯，昨日到中學宣傳，大受學生哥歡迎。談到劇中一幕裸背戲，她透露清場拍攝，只留下袁偉豪，明益對方；而袁偉豪即笑言不枉與智雯相識多年！
藝人袁偉豪、黃智雯及陳智燊等昨日到小西灣一間中學宣傳劇集《三個女人一個「因」》，與學生大玩遊戲。劇中有多重性格的智雯獲激讚，她坦言有緊貼網友的留言，問是否吐氣揚眉？她笑言對此劇一直有信心，因為題材新鮮，而她亦有大突破，算是最「考牌」的一次！對於其中一個人格「愁擘擘」大受歡迎，智雯說：「網友話好Girlfriendable、好善良，想攞返屋企養，好搞笑！」袁偉豪亦說：「我都想將佢私有化！」
好有安全感
提到劇中一幕裸背戲，智雯表示拍攝時要求清場，只剩下拍檔袁偉豪，甚有安全感，袁偉豪笑說：「不枉識咗咁耐，對我真係好！」智雯即說：「有好嘢梗係益你！」 提到好友姚子羚回復單身，智雯相信對方很快回復心情，問對方有否訴苦，她說：「太私人嘅冇講，在心中，姊妹都要畀空間，佢想Share自然會Share！」至於其感情生活，智雯表示穩定、開心。
陳智燊為B狂操
而陳智燊笑言跟太太宋熙年已諗定將來子女的升學問題：「可能未生BB已經要聯絡學校做義工，會容易啲入學。」講到造人大計，他笑言「操緊」：「操肌呀！我哋生活檢點，唔煙唔酒，飲食健康，希望快啲有成績。（想生仔定女？）男嘅易湊啲，女嘅嗲爸爸多啲，總之平常心啦！」而宋熙年前晚出席《東張西望》活動時笑言，希望生了幾個小朋友都繼續做。
文：影視組