票房破4000萬 黃子華開Live謝票派阿佘C君找數
由黃子華、佘詩曼主演的賀歲片《棟篤特工》昨日衝破四千萬票房，子華及一眾演員玩直播答謝觀眾支持。演慣棟篤騷的子華，其粉絲都愛叫他「除褲」、「回水」作口號打氣，但今次子華謝票卻未有除褲找數，只派C君和阿佘清唱片中的歌曲助興。
藝人黃子華、佘詩曼、鄧兆尊、C君、林雪及電影公司老闆蕭定一等昨日於《棟篤特工》慶功宴前，於社交網站做直播答謝觀眾支持，蕭定一宣布電影票房截至昨午已超過4,000萬，對成績相當滿意，十日後將公布內地上映日期。打破「票房毒藥」之名的子華相當興奮，席上幾乎全程由他帶動氣氛，更安排阿佘與C君清唱電影中的歌曲《就算死也不會留下你》，阿佘不停打拍子，由C君領唱，二人不時重複歌詞「我想結伴去飛」，雖然表現有點Hea，但阿佘不時揮手，用身體語言搭夠當找數。
林雪拍攝時險休克
《棟》片開拍之初不被看好，子華更指拍完便會各自四散，但C君則力撐子華，笑言早已料到會有4,000萬票房：「我冇諗呢啲嘢，子華搵我拍戲，我唔收片酬都拍啦！但其實又唔可以收太平，拍嗰時唔識享受，每日都好緊張。」眾人齊齊飲香檳慶祝時，子華重提林雪拍攝時暈倒：「你盡量唔好郁，上次你郁一郁就入咗醫院。」林雪解釋當時險些休克：「張床食唔到力，搞到我成日跣倒。拍完三至四Take，所有嘢都天旋地轉。」子華笑言如果死人，電影可能不可在賀歲檔上映。
兆尊因家庭壓力接演
另外，子華又誇口指若票房達5,000萬，會破格地慶功：「會係一個唔同嘅慶功，世上冇人做過，會講我拍攝時有幾唔開心同唔鍾意邊個。」至於會否開拍續集，蕭定一則指要與子華度期。期間監製又特別多謝飾演變性人的鄧兆尊，兆尊表示拍之前都曾猶疑，但笑言不幸被女友聽到邀拍人是子華，是受「家庭壓力」接演：「身邊人一聽到子華嘅嘢就話要拍o架，所以我咪拍囉，係家庭壓力！」此外，兆尊日前接受ViuTV節目《晚吹──總有一瓣喺左近》訪問，表示當年在爸爸鄧永祥的靈堂上不小心睡着，在半睡半醒間覺得有人大力拍他後腦一下，但醒來只見妹夫一人在他十呎以外燒紙錢，令兆尊覺得是爸爸責備他「瞌眼瞓」，又指爸爸生前也喜歡跟他開這種玩笑。
文：影視組