黎瑞恩談婚變 太Man唔識嗲

黎瑞恩將於4月5及6日再踏紅館舉行《黎瑞恩感恩有你演唱會2018》，阿恩接受本報專訪，自爆16年前在紅館開騷後，曾經有人問她：「你幾時會再喺紅館開演唱會？」她笑言：「當時我答：『我離婚之日就係喺紅館再開演唱會之時。』點知畀我講中咗，呢件事真係邪惡，哈哈！（點解當時會咁講？）你冇理由無啦啦走去開騷o架嘛，我嗰時做完個騷就去結婚喇，結完婚一路冇嘢梗係唔會再唱歌啦，係咪先？當你再有機會唱歌，咪就係我離咗婚嘅時候囉。（你開口中！）真係好鬼烏鴉嘴！」今次唱完又如何？她笑言不會有事，因為她已回復單身。

過咗底線唔好夾硬

阿恩與曾智明於2014年離婚，但她不覺得是人生一大挫折：「我成日覺得如果有啲嘢係唔啱，你監生要擺埋一齊，會唔會好痛苦先？有啲嘢可能已經唔再屬於你，你夾硬再落去會唔會變番好？我真係好難諗得通，因為我嘅性格，有啲嘢唔得就唔得，你過咗我底線，永遠都唔得o架啦，我係好堅持呢樣嘢。」

黎瑞恩於2002年婚前舉行引退演唱會，哭成淚人。

黎瑞恩與曾智明離婚，覺得自己亦要負責任。

有啲嘢自己都做錯

她坦言分開後可能大家都開心，更直認當時確實好嬲前夫：「肯定有啦，癲咗！（被另一半背叛接受唔到？）我想知有邊個可以接受到？當時火遮眼，乜都唔得o架！但依家覺得可能未必係佢一個造成呢件事，可能有啲嘢自己都做錯，都有朋友提醒我，話唔可以賴晒佢，話我都可能要負番啲責任。（你覺得自己責任喺邊？）個人太Man，可能有啲男人鍾意啲嬌嗲女人。」她隨即扮嬌嗲聲：「我真係好需要你！但我真係唔係囉！」她坦言當時夜闌人靜，忍不住爆發喪喊。至於可有想過再婚？阿恩笑說：「嘩！冇諗喎，又唔係未結過，唔使啦。（驚咗？）我冇驚喎，不過年紀大結婚都幾浪漫呀。」

文：音樂組