歌手葉佩雯（Grace）跟老公郭偉亮都是愛狗之人，本來家中飼養兩隻百威爹利Toro及Nana，但去年14歲的Toro因鼻咽癌病逝，而Nana最近身體不適有少少面癱狀況，原來Nana的神經免疫系統出現問題，Grace說：「自從Toro離開咗之後，Nana心情都冇咁好，醫生都話佢嘅自身免疫系統發炎，可能係情緒影響到。」初時一度令Grace非常擔心：「睇醫生知道咗問題，呢個病唔係醫唔到，咁先放心，不過需要時間慢慢治療。」
Grace表示見到Nana不肯進食，她就開始擔心，後來發現牠有牙痛，就帶牠去剝牙，好轉一輪後，有一日突然發現Nana左邊嘴有「下墜」情況：「我諗點解會咁？會唔會因為剝咗牙？之後再發現佢眼皮、耳仔一邊斜咗少少。」她即帶Nana去看專科醫生，經過磁力共振及抽腦水化驗，得知Nana眼神經系統發炎及有腦膜炎：「佢有乾眼症，同少少眼潰瘍，但醫生話唔係重病，主要係自身免疫系統問題，令神經線發炎影響到，目前要服藥。」
打算讓Nana嘗試針灸治療的Grace說：「每一日要幫佢按摩面部肌肉，等佢唔好萎縮，隻眼要努力幫佢滴一啲好滋潤嘅藥水，仲要幫佢合埋隻眼瞓覺，要食一段長時間嘅藥，醫生話要等佢自己身體慢慢復原，暫時冇影響佢日常生活，佢食得瞓得，情況OK嘅，只不過係偏埋咗少少，影響到佢有高低耳。」由於Nana跟Toro並非兄妹，故沒有任何遺傳健康問題，令她較為放心。
文：音樂組