龍劍笙由頭撐到尾感動眼濕濕
名伶龍劍笙（阿刨）演出廿場的劇目《牡丹亭驚夢》前晚圓滿落幕，獲刨迷讚譽舉世無雙的阿刨更眼濕濕，與粉絲一樣依依不捨！新娛國際負責人丘亞葵揚言會盡力再度邀請阿刨再臨香江演出，希望劇迷繼續有眼福！
由阿刨領軍演出的經典戲寶《牡丹亭驚夢》，先於尖沙咀文化中心演出十場，之後轉戰香港理工大學賽馬會綜藝館再演十場，聲勢浩大之餘更是場場爆滿，可謂粵劇界的一大盛事。
鐵粉贈巨型賀卡
阿刨廿場演出都發揮超水準表現，將主角柳夢梅的調皮、多情及威武性格演得出神入化，令一眾劇迷目不暇給，但天下無不散之筵席，到前晚最後一場，一班阿刨的粉絲都只能拎住螢光棒含淚大嘆不捨！謝幕時，阿刨聯同藝術總監任冰兒、主辦單位負責人丘亞葵等，率領一班演員向觀眾致意，期間有鐵粉向阿刨送上寫滿祝福字句的巨型賀卡，當中更有人讚她「舉世無雙」，令阿刨眼濕濕非常感動！
丘亞葵昨日受訪時便指一連廿場的演出非常成功，而阿刨更絕對是功不可沒：「佢好辛苦，上台時要瞻前顧後，不但支撐成台戲，仲要帶領、教導其他演員，同佢哋密鑼緊鼓咁綵排，付出咗好多心機同時間。而且佢柳夢梅個角色係好難演，但佢仍然駕馭得好好，層次分明。」
他又指對其而言，最大難關是中途轉場地：「第二輪個場地比較陌生，但最終都克服到。大學方面都話就算流行樂演出都好少咁多場，但估唔到今次做粵劇可以咁成功，令佢哋好驚訝。」至於會否加場或者轉劇目再演？他就指《牡》會暫告一段落：「其他就要等阿刨休息完再決定，其實戲迷嘅心意我哋係收到，所以我哋都會盡力，希望阿刨很快會繼續返嚟演出。」
文：影視組