Bruna認對陳偉霆一見鍾情
陳偉霆（William）緋聞女友兼巴西索模Bruna G Marth，最近挾「新霆嫂」之名及44吋長腿的優勢來港發展，她大讚William又Cute又Sweet，第一眼已被他吸引。雖然被對方的粉絲攻擊並要求她收斂性感，但她堅持做自己，坦言想好似VS模般，火辣無限度！
在內地人氣爆燈的William最近與24歲巴西索模Bruna傳緋聞，女方被拍到與William及其家人食飯，關係耐人尋味。雖然貴為「新霆嫂」，又被William粉絲叫她收斂性感，但Bruna接受本報專訪時依然未有吝嗇身材，以低胸短裙上陣，非常養眼。
唔識中文 懶理惡評
談到與William的關係，Bruna以「好朋友」來形容，回想第一次見面已對他有好感：「當時唔知佢係藝人。（對佢第一個印象係點？）佢好靚仔，好好笑容，好Cute同好Sweet。之後識落覺得佢係一個好好嘅男仔，心地好好。」雖然兩人來自不同國家，Bruna稱溝通上完全沒問題，且選擇男友亦不會在乎對方的國籍。問到擇偶條件？她認為首要尊重她的工作：「我影過唔少性感相，拍過唔少內衣品牌廣告，但呢個係我嘅工作，我係專業模特兒，另一半要明白。正如做藝人，有需要同其他異性或同性接吻，我都會接受。」
受惠於緋聞，Bruna知名度急升，但同時遭不少William粉絲在網絡攻擊，叫她減少性感，不過Bruna一於少理，並揚言目標是踏上Victoria's Secret的舞台行內衣騷：「我知道粉絲好錫William，有好多人喺我嘅社交平台留言，但我唔識睇中文，唔知佢哋寫乜。（受網絡攻擊會唔會難受？）唔會，平常心。（會唔會收斂吓？）我知自己出咗名，但都係會做番自己。（會唔會介意同William合作？）有何不可？」
每日健身1粒鐘
年紀輕輕的Bruna原來已有9年做模特兒經驗，她透過巴西的模特兒選秀節目入行，在逾千名參賽者中勇奪第三。她對身材亦有自信，尤其一雙44吋無敵長腿，為保持完美體態，她每日堅持至少做一小時健身運動。
文：名人組
服裝：Intimissimi
場地：HMV