「性福」伍姑娘同老公各有各玩
藝人伍詠薇（伍姑娘）前晚與性治療師何慕詩暢談「性福」樂趣，直言性生活愉快的她搞Gag說：「我92歲喇，睇我幾靚、唔Dry！我未結婚嗰陣，同居都有性生活！（會同老公講性？）會，同人哋老公都會講，起初拍拖會忌諱呢個話題，但相處耐咗就會講，係正常談論，分享係好嘅，唔分享就唔知對方感受。當然啦，我話『同人哋老公都會分享』係講笑啫，唔應該分享人哋老公！」
伍姑娘昨日與鄧月平宣傳奇妙電視節目《四小時生活圈》，談到老公練海棠，她笑說：「佢有佢玩，我有我玩！」之後解釋道：「我講笑啫！我哋兩公婆關係就嚟踏入第19年，可以好似朋友咁講笑，如果係真嘅話，點可以攞出嚟講呀？直頭火都嚟，衝晒上頭啦！」鄧月平則自爆在台灣拍節目以兔女郎裝賣臭豆腐：「生意好好，仲巧遇何潤東！」