言行舉止出名「惹火」的美國真人騷女王Kim Kardashian，竟在新一期雜誌封面搽黑塊面，化身「黑版甘迺迪夫人」，繼早前搽黑拍美容廣告捱轟後，再被狂插種族歧視！
36歲的Kim最近與4歲的女兒露芙（North West）齊上《Interview》雜誌封面，Kim「好玩唔玩」，竟扮美國前總統約翰．甘迺迪（John F. Kennedy）夫人積琪蓮甘迺迪（Jacqueline Kennedy），更疑似為了配襯女兒膚色而塗黑塊面，被轟種族歧視！雜誌以大字標題形容Kim為「美國新第一夫人」，操刀的名攝影師Steven Klein則解釋，他只是捕捉女性自強的一面。不過網民似乎唔多Buy呢位「黑版積琪蓮」，紛紛到社交網留言批評兼洗版，有人直斥雜誌的手法：「點解要整黑Kim嘅皮膚，令佢睇落似黑人？」亦有人留言：「大家都知露芙係Kim個女，冇需要搽黑！」更有網民認為樂壇天后Beyonce才稱得上是「美國第一夫人」，指Kim不配與積琪蓮相提並論。
其實Kim兩個月前為自家美容產品系列KKW拍廣告時，已因疑搽黑膚色遭網友圍攻，她在廣告中的膚色明顯比以往深，當時網友調校圖片光暗後，看起來較似Kim平日的膚色，Kim今次似乎沒有從廣告風波中汲取教訓。
除了Kim因「變色」捱批外，其變性人繼父Caitlyn Jenner最近同樣惹是非！多次公開與美國總統特朗普（Donald Trump）劃清界線的她，早前被影到戴上印有特朗普參選口號的帽外出，故被指暗中撐特朗普。日前她出席洛杉磯LGBT合唱團表演時，被跨性別人士支持者圍着質問，但Caitlyn沒有為自己辯護，只說：「你哋唔了解我。」令支持者更（興）！
文：外娛組