林奕匡加國娶妻喊足全程

恭喜恭喜！林奕匡在溫哥華的UBC大學校園迎娶拍拖10年的女友李靄璣（Rikko），並在一間有過百年歷史的古宅行禮。好友馮允謙、樂隊Dear Jane主音黃天翱（Tim）、組合Robynn & Kendy、黃美棋及男友鍾健威（Ray）等，更專程飛到當地擔任兄弟姊妹團。上周已飛抵溫哥華的新郎新娘，特意請來老師學跳舞，在婚禮上跳出first dance的他們更sweet爆咀嘴！

黃美棋加幣摺心當賀禮

Phil在婚禮前接受電台長途電話訪問時，透露自己非常淡定，但事後就自爆在婚禮上多次感動落淚：「當我哋遞茶叫爸爸媽媽嗰吓，好感動，咁多年嚟佢哋（Rikko父母）都當我係親戚嘅一部分，今次係正式向佢哋表示敬意，嗰吓真係冇得唔喊。」而Rikko亦同樣由斟茶開始喊足全程，直言很感激世界各地的親友飛往當地出席婚禮，又透露黃美棋及Ray以828元加幣摺成心心擺設，再加上心意卡作禮物。問到造人大計？Phil坦言兩年後才會考慮，希望先生仔後生女。

新娘子笑指Phil是長線投資，拍拖十年終於有回報。	黃美棋與男友鍾健威製小手作做禮。	Dear Jane主音Tim（左）與馮允謙齊任兄弟團。

明年3月補擺酒

一對新人稍後會拉隊去溫哥華小鎮旅行，預計明年3月在港補擺喜酒，屆時可能會補做接新娘和玩新郎的環節，之後再去意大利度蜜月。

而擔任婚禮攝影師的Ray，透露Phil與Rikko讀誓詞時，現場氣氛感人：「有幾個位Rikko喊住聽Phil講嘢，而Phil亦忍住啲眼淚，在場好多人都開始抹眼淚，因為大家睇住佢哋拍拖十年。Rikko仲話Phil係長線投資，依家終於有回報，Phil真係好努力。」

文：音樂組