時裝設計師鄧達智看過Gaile的婚紗及晚裝後，認為兩件均設計簡潔兼帶性感，跟Gaile鬼妹仔性格很夾，他說：「婚紗嘅特色係用咗淡金色嘅繡花，淡金色設計喺袖度，好特別，係優點，可惜上身同下身，中間腰位分隔咗，喱士繡花上身同下身冇連接到，分開咗係有啲可惜，如果連接住會更加完整；而且中腰以下腹部位置好窄，未必係佢有身孕，因為女仔一般有曱甴肚，冇足夠空間嘅話，坐低起身會唔雅觀，相信設計裁剪同Fitting差咗少少，下身大半碼會舒服好多。」
至於另一襲Deep V露背晚裝，鄧達智認為身上的釘珠釘片，用來跳舞，在燈光照射下閃令令好靚，「簡直有90分，釘珠釘片細節同光亮度，晚裝嚟講非常之優秀。」至於Ian淺色西裝配黑色長褲，是穩陣的着法，他更留意到Ian領位帶點淡金色，與Gaile的婚紗十分配襯。