杜德智心急解禁 測試性能力

杜德智（Orlando）一向身形弗到漏，但原來身體暗藏「殺機」，數年前他騎電單車時不幸發生意外，當時自覺問題不大：「嗰時有做物理治療，覺得冇咩事，不過耐咗個Hip位開始痛，間中痛一次，但可能年紀大，痛得愈來愈厲害，跟住去照X光，醫生話我髖關節歪咗，要做一個比較龐大嘅手術。」

停工損失六位數

上月Orlando到台灣接受手術，問到為何選擇台灣？他表示跟父親有關：「爸爸已經過咗身，佢當時住過台灣呢間醫院，同醫生好熟，加上繼母都喺台灣，可以同佢聚一聚。」他指手術相當成功，共留院七天，手術後翌日已可落床走動，他「真空」穿上病人袍用助行器在醫院走來走去，結果不小心露股，非常「股惑」！

Orlando透露今次手術費達14萬港元，並要停工一個月休息，但貴為星級教練，據知他因停工損失約六位數，但他認為金錢事小，最重要是身體健康：「原本諗住做完手術減輕三成痛楚已經好好，依家係百分之九十唔痛。」講到康復進度理想，但手術位置可有影響性能力？Orlando大方笑說：「呢排未試過（曳曳），可能初初做完手術會有影響，因為我轉唔到身。（依家試吓有冇問題？）希望Lucky試到啦，嘻嘻。」

文：專案組