陳柏宇跪慣玻璃：簡單嘢
歌手陳柏宇（Jason）、Kellyjackie和林盛斌（Bob）前晚出席沙灘騷活動，講到Jason因忘記約了未婚妻符曉薇做婚前檢查，而自稱會跪玻璃謝罪？Jason笑言：「簡單嘢，跪慣啦，跪到膝頭啲皮好厚。（買嘢氹番未婚妻？）一定唔會買嘢氹，呢啲係好唔健康嘅習慣。」他稱第二天已去了做婚前檢查，補鑊成功。
至於Kellyjackie身形突然脹爆，她稱早前因胃部不適照胃鏡，發現胃入面有息肉，幸屬良性，已進行手術切除，而腫脹是否內分泌失調，仍要等醫院報告才知道。而早前因生腎石要在尿管裝上支架的Bob，體內腎石已自然排出，他坦言：「醫生話女人最痛係生仔，男人最痛係生腎石同膽石，其實裝上支架後小便都好痛，但都冇法。」Bob稱醫生指他生腎石是因少飲水、食肉多及經常忍尿而致。
