鄧麗欣負傷上陣 輸足4場
藝人鄧麗欣（Stephy）率領排球隊參加公開賽再次輸波，雖然飽受頸椎移位及肩胛肌發炎困擾，但Stephy仍負傷落場頂硬上。另外，今次球隊換了新教練，她解釋稱舊教練分身不暇，跟早前報道所指舊教練與球證有嗌霎一事無關。
Stephy昨日率領排球隊Loey參加「第37屆全港公開排球錦標賽2017」女子乙組賽事，前3場比賽Loey表現未如理想，但今次默契比之前好。比賽期間，Stephy只出場幾次已疲態盡現，狀態似乎麻麻，雖然球隊於第二局取勝，但最後仍以局數2比1落敗。
只望唔使降班
賽後受訪時，Stephy表示今場比賽球隊默契確實有改善，若第一局能好好發揮會更好，不過自己卻因頸椎移位導致發炎，所以只能替換後排位置落場。問到是否因工受傷，她指不多不少是受生活習慣影響：「醫生話可能坐飛機同坐車坐得多，姿勢唔好，上星期開始覺得練完波唔舒服，以為瞓完覺就冇事，但尋日好痛去咗睇醫生，所以今日比賽要臨時變陣。（會影響之後嘅比賽？）一場還一場，下次都要重新嚟過，影響實會有，見到佢哋好似都唔係幾開心。」提到輸了4場賽事，對今季可有甚麼期望？Stephy坦言不會諗升班，只希望不要跌回丙組。
教練太忙搵替補
問到是否換了教練，Stephy直言前教練因為太忙而分身不暇，新教練是以前打青年軍的同屆師兄。問到是否因為早前有報道指舊教練與球證有嗌霎而替換？她否認：「唔關事，其實嗰件事之前都有諗過，唔係換，係替補住先，因為佢真係好忙。」談到工作方面，她表示即將開始籌備拍攝電影，幸好時間能配合球季賽事。另外，Stephy於賽後數小時在Instagram上載照片，指上一次頸椎受傷是7年前，希望能盡快痊愈：「那種有心無力在排球場上真的不能硬撐，我要好好休息，希望盡快復原，下場繼續努力！」
文：音樂組
攝：劉斌