阿叻啜爆壽星黃杏秀 志偉旺爆老婆激罕亮相

運氣好到爆的曾志偉，年初以2,600元買馬贏1,600萬，至今仍為馬迷熱論，他今個月再於香港電影金像獎贏得最佳男配角，喜上加喜，而昨日64歲生日的他，前晚出席慈善齋宴時，獲提早慶生，席間太太宋麗華更罕有現身慶祝及切蛋糕，志偉即場合十多謝大家的心意。當晚大會司儀崔建邦及梅小惠帶領眾人齊齊唱生日歌，活動共籌得450萬善款，用於修建寺院。

阿倫份禮物「要搵吓」

志偉昨晚則與同日生日的61歲黃杏秀於馬場舉行生日會，筵開十多二十圍齊齊慶祝，由早前贏了彩金的志偉負責埋單。到賀的圈中人包括佘詩曼、王祖藍、黃日華、郭少芸、梁靖琪、謝天華、陳法蓉、湯盈盈、狄波拉與夫婿等。問到生日願望？志偉說：「最緊要身體健康。（再贏馬？）冇所謂啦！（全部你埋單？）應該啦！之前贏馬，今次有機會請客！（送咩畀秀姑？）共『免』之（唔使送）！（不醉無歸？）冇得走啦！試吓瞓馬房都好喎！未試過！（仲有咩特別嘅朋友會嚟？）冇啦，只係一啲唔想送禮又唔嚟嘅人，好似譚詠麟咁！佢一早打電話嚟耍冧，話要做嘢唔喺香港！話送咗禮物叫我搵吓，依家玩遊戲節目咩！」志偉兒子曾國祥與女友王敏奕到賀，他說：「夾份送禮物畀佢，秘密嚟，想畀Surprise爸爸，其實今朝拜祭阿爺時已經送咗，佢都好開心！（擔心爸爸飲醉？）梗喺啦！不過佢最近紀錄良好。」

阿叻冧妻：係我福氣

而壽星女黃杏秀與老公陳百祥（阿叻）一同受訪，阿叻賣口乖讚老婆，更即場獻吻：「我人生做得最啱嘅事就係娶黃杏秀做老婆，係我嘅福氣，我嘅人生都冇乜出頭日子，惟有娶個旺夫老婆！今晚老婆生日，酒席方面係我安排，但就志偉埋單！」阿叻稱賓客到場送的禮金，將會全數捐給早前病逝的藝人高飛。而到賀的佘詩曼與郭少芸表示成班姊妹將與志偉的合照砌成牌匾送上，極具心思。

文：影視組