惠英紅如願：做咗功德

金像影后惠英紅前晚與英皇電影《幸運是我》演員吳業坤、邵音音、陳家樂、吳日言、配樂波多野裕介及導演羅耀輝到銅鑼灣謝票。紅姐得到觀眾熱烈拍掌歡迎，有觀眾大讚：「紅姐，你嘅演出睇到我好感動！」有影迷送花給紅姐，邵音音見狀笑言：「我冇(口架)？」紅姐聞言即下跪，借花敬佛。

慶功飯有排食

紅姐指公司安排電影再上畫：「套戲再上畫公演，其實都幫唔到公司賺幾多錢，但希望加深大家對腦退化症嘅認識！得獎當晚收到來自世界各地數以百計嘅短訊，亦有人私訊我，問關於腦退化症，我覺得自己做咗功德！諗番攞獎當晚心情緊張。（緊張到仆親？）我起身上台嗰刻想拎起條裙，但太緊張拎唔到，搞好耐！（同亡母分享咗得獎喜悅？）之前為媽媽做咗法事，師傅話新墳唔可以拜住，否則先人受罪。（食晒慶功飯未？）同邵氏舊同事，公司老闆楊受成先生、電影劇組食咗，嚟緊會同林建明食飯，我拍緊嗰個劇放咗我三日假，好快又重投工作！」

惠英紅借花敬佛，向邵音音下跪送花。	惠英紅前晚率領同片演員謝票。	惠英紅於金像獎當晚因裙襬太長而險仆。

吳業坤「露蛋」都制

此外，問到杜汶澤在網上發文炮轟曾志偉唔尊重姜皓文一事，紅姐表示：「我唔參與喇，但佢哋都實至名歸，志偉咁有經驗上到台都咁樣，正如我一樣有好多醜態，睇番自己攞獎片段覺得好烏wear！」

至於失落金像獎「最佳新演員」的吳業坤表示：「我冇失落，一早預咗係墊屍底，能夠獲評委支持已經好榮幸，希望今後可以拍多啲好電影。（為電影可以好似梁朝偉咁露蛋蛋？）得，露埋蛋黃都得呀！」

文：影視組