陳琪離巢：無奈先精彩！
於無綫度過廿年光陰的藝人陳琪，於下月7日滿約便離巢，展開人生另一頁！前日她為無綫新劇《深宮計》最後一天開工盡顯不捨，故趁午飯時間走到化妝間找馬國明、陳煒及單立文等同事集郵，眾人獲悉她將離開也送上祝福。
被老公揶揄冇貢獻
回想畢業後投身社會的第一份工便是效力無綫，陳琪坦言光陰似箭：「仲差幾個月就拎到長期服務個金牌，但係人生就係要有無奈先變得精彩，其實當初傾續約時都好矛盾，無綫的確畀咗好多嘢我，畀我識到老公胡諾言，又生咗三個小朋友好滿足，要說再見真係唔捨得，但呢分鐘我搵唔到突破嘅空間，所以就想試吓其他嘢。」更指老公尊重其決定，笑言着老公畀心機搵錢，沒料被對方揶揄冇貢獻，令她哭笑不得！
談到新動向，忙於做「KOL」的她滔滔不絕，表示平日有透過社交平台分享湊小朋友的心得，以及推介相關產品，沒想過所推介的產品也賣斷市，驅使她蠢蠢欲動想嘗試做小朋友生意：「其實家長投資小朋友嘅錢仲貴過買樓，所以呢門生意絕對諗得過，但我唔倉促，再睇定啲先。」
文：影視組