阿Sa拍拖收男裝銀包最驚喜
蔡卓妍（阿Sa）與周柏豪拍戲演情侶，大玩送禮物蝦碌錯摸，阿Sa自爆以前拍拖亦收過不少騎呢禮物如男裝銀包，令她「驚喜」萬分！周柏豪則笑言收過粉絲送的噴金鉸剪，還搞笑地幫粉絲解說：「可能佢想祝我剪多啲綵啩！」
藝人蔡卓妍（阿Sa）和周柏豪早前拍攝英皇電影《原諒他77次》，劇情講述柏豪施展冧功為阿Sa慶生，令她誤會柏豪藉機求婚，豈料疑似戒指盒中的竟是一張雲端儲存容量的證明書！
阿Sa坦言現實中亦收過啼笑皆非的情人驚喜，她說：「讀書時收過最驚喜嘅情人節禮物係男裝銀包！（嬲到分手？）又冇咁老土，阿媽教落，女仔靠自己，唔好旨意人！其實我同編劇李敏都想拍到一套好似《無痛失戀》（Eternal Sunshine of the Spotless Mind）咁細膩、講男女關係咁中嘅戲，結果李敏寫咗呢個劇本，我諗好多人都有共鳴，套戲好反映現實，我啲助手同朋友都話有經歷過！」
慈善收據keep一世
柏豪則稱只送獨一無二的禮物給另一半，他說：「我份人鍾意浪漫，鍾意寫歌做禮物，夠獨特！現實中收過最獨特嘅係歌迷送嘅鉸剪！不過把鉸剪噴晒金色，可能係祝我剪多啲綵啩！我又一直叫歌迷將買禮物嘅錢捐去做善事，將收據摺朵花送畀我，我會keep一世！」
文：影視組
攝：吳文聰