楊秀惠食唔落增肥變暴瘦
無綫小花楊秀惠被安排與老戲骨張衞健合作，令她緊張到由原本增肥變減肥，更自爆當初來港發展，因不習慣而出現情緒波動，要向心理醫生求助。而最近於新劇扮演心理醫生的她，表示開工期間勾起不快回憶，幸而獲拍檔曹永廉等開解。
楊秀惠、馬國明、楊明、曹永廉及蔡思貝等昨日出席無綫新劇《心理追兇Mind Hunter》的宣傳活動。秀惠以喱士露腰裝亮相，被發現增肥失敗，纖瘦得我見猶憐，她靦腆地說：「今日發現屋企得身上呢條褲啱着咋！之前肥咗一公斤，一開劇就瘦番，已經唔敢上磅嘞！」原來暴瘦原因竟與張衞健有關：「佢咁專業，依家同佢拍《大帥哥》，我緊張到食唔落嘢，都同自己講要放鬆啲，咁先可以演好角色。」
曾經睇心理醫生
在《心》劇中扮演心理醫生的秀惠，坦言角色令她感觸：「諗番起啱啱嚟香港唔太適應，成日喊又暴食，真係睇過心理醫生，好彩時間唔算好長。今次一開劇啲回憶又返嚟，好感觸，叫助手唔好同我講嘢，不過曹永廉話做呢行，情緒波動好正常喎！」
馬國明間中驚喜
馬國明於《心》劇中亦扮演心理醫生，「粉身碎骨」追查女友湯洛雯離世原因。問到現實曾否如此投入一段戀情，他說：「要到咗嗰個境界先知。（唔浪漫？）一半半啦，真係鍾意一個人，係喺現實中多照顧對方，間唔中可以有啲驚喜嘅。（例如食日本菜同睇戲？）咩呀？我同自己父母都會做呢啲事，不過呢排冇時間。（加把勁約人啦。）真係冇時間。（黃心穎冇投訴？）冇用投訴語氣，正常講嘢囉。」
楊明因趕拍新劇《抱佣情人》致遲大到，問及外傳其女友莊思明查他的電話及行蹤？楊明說：「冇，唔使啦，呢排開工，佢好多線眼喺度，佢係緊張我有冇按時食飯啫。（你管佢？）冇時間，我叫佢多啲搵朋友玩，遲吓會好忙，依家唔玩冇得玩。」
文：影視組