吳綺莉避談見女：溝通要時間！

藝人吳綺莉與女兒卓林早前再度因爭執而導致警方介入，事後卓林未有返回母女同住的大坑寓所，而吳綺莉昨午2時許駕車外出，並隔着口罩說：「我出去處理私事。（同囡囡關係點？）日前講咗唔再講。」原來她前往大埔睇中醫，問到現時情緒如何？她說：「情緒依家唔係幾好。（大家都好關心你哋母女情況。）冇嘢，只係阿媽同女嗌交，你知依家嘅小朋友啦！（同阿女溝通有問題？）咁我哋（指與記者）都識好多年先溝通到，溝通要時間，係個過程。（擔心個女？）佢已經18歲。（有冇聯絡？）總之佢安全，依家年代唔同喇！（幾時同佢見面？）總之真係OK啦！」其後她到大美督醫肚，逗留半小時便驅車返大埔舊居。