薛家燕學做笑奶奶氹新抱仔
無綫新劇《燦爛的外母》演員薛家燕、林嘉華、湯洛雯、姚子羚、黎諾懿、張頴康與甄穎珊等昨日到將軍澳電視城試造型，兩年冇拍劇的薛家燕今次獲公司度身打造劇本，她希望扮演外母一角能為觀眾帶來歡樂。提到兒子求婚成功，快將成為奶奶的她被問到與未來新抱是否相處得來？她說：「OK，我都好鍾意呢個未來新抱，同埋會喺套戲裏面好好學習。」薛家燕今次特別向監製提議，邀請在加拿大定居的林嘉華再回巢拍劇，嘉華對此說：「本來我想同家燕姐有愛情線，但係佢唔鍾意我呢啲花o靚仔！」又指今次有別過往的嚴肅角色，會帶點不羈感覺。
姚子羚年內嫁唔出
姚子羚在新劇飾演「控制狂」女友，與林嘉華有親熱戲，現實中與男友鄭子邦感情穩定的她笑言一定不會控制男友：「因為我都唔鍾意人哋控制，所以畀另一半嘅自由度好大。（開劇阻住結婚？）我今年工作排期到12月！（你係咪已經結咗婚？）未呀！（另一半等唔等得？）佢好好，我之前去咗橫店拍劇，返到嚟佢都同我講一啲好Sweet嘅說話，仲特登買花收埋喺床入面畀Surprise我。（順便求婚？）真係冇！有好消息會同大家講。」又透露與「胡說八道會」一班好姊妹最近密斟新搞作。
文：影視組