國足奇招打殘南韓

中、韓兩國關係近日因為「薩德風波」嚴重惡化，國內掀起一片「反韓潮」，中方賽前特別派出逾1萬警力維持秩序，為着避免引起騷亂，當局賽前亦下發通知，要求全市公共場所昨晚唔好直播賽事，舉行比賽嘅賀龍球場，更加限制只許賣8成門票。對於賽前只得2分、排A組包尾嘅國足嚟講，想保持僅餘出線希望，今仗可謂許勝不許敗。為了加強贏波機會，國足特別安排今仗喺「福地」長沙出戰，有中央電視台主播日前仲喺節目中笑言，呼籲球迷喺比賽前一晚去南韓國家隊下榻嘅酒店附近放炮仗，阻礙球員休息，點知昨晨真係有人咁做，據網民透露，當時每隔10分鐘便有人喺該酒店樓下放炮仗，對住客造成嚴重騷擾。

于大寶35分鐘頭槌奠勝

南韓球員可能真係受影響，昨晚比賽一開波已經被國足搶得主動權，國足喺上半場35分鐘仲憑于大寶接應左路角球搶點成功，用頭槌「跣」入遠柱先開紀錄，領先1球返回更衣室。下半場南韓以金信煜入替李庭協企圖反撲，國足則用中場吳曦頂替武磊加強中場截擊力。南韓中場奇誠庸先後兩次起腳射門，皆被國足門將曾誠飛身撲走，之後後備入替吳曦禁區邊第一時間撞射，南韓門將權純泰僅僅救出，國足未能拉開紀錄。75分鐘，池東沅近門頭槌被曾誠救出，之後洪正好嘅頭槌又被企喺近柱嘅吳曦護空門，結果國足成功保住1比0勝果完場。納比喺上年10月成為國足主教練後，踢到第4場比賽終於首嘗勝利滋味。

自2005年起計，國足喺長沙踢咗9場國際A級賽事未輸過，果然無負福地之名。中國贏波後於A組6戰得5分，保持出線機會，但因同晚敍利亞主場1比0絕殺烏茲別克，令南韓以10分保持第2位。亞洲區第3圈外圍賽12支球隊分兩組，每組6隊進行雙循環比賽，每組首、次名可以直入世盃決賽周，小組第3名則進行主、客兩回合附加賽，勝方會同中北美洲第4名角逐一個決賽周席位。國足下仗會喺下周二晚作客鬥亞洲區世界排名最高兼出線大熱門伊朗。