林奕匡求婚險被女友識穿
歌手林奕匡（Phil）昨日偕陳倩揚、顏子菲等出席關於環保的頒獎典禮，講到前晚在網上宣布向前無綫體育及財經主播女友李靄璣（Rikko）求婚成功，他興奮地表示計劃已久，去年初已開始構思及睇定戒指。講到求婚經過，他表示九年多前首次跟女友到澳門玩：「嗰時我哋去咗大三巴，我抱佢上去，但去唔到頂，太熱，差啲氣絕身亡，女友講過嚟次係佢人生中最浪漫(o既)事，所以我想重演呢件事。」他笑言大計差些被女友識穿，因為他趁女友跟朋友吃午飯時去花店訂花：「點知佢突然打嚟話唔記得帶銀包，所以我返轉頭救佢，佢就覺得奇怪，話我唔係喺樓下食飯(o架)咩，但最終佢都冇識穿。」
女友返屋企先識喊
Phil笑言今次成功抱到女友行上大三巴，自己亦有準備戒指、花及跪地，問到女友可有感動到喊？他笑言：「佢有眼濕濕，但佢嗰陣太亂，結果夜晚返到屋企先大喊。」他計劃九月在溫哥華舉行婚禮，笑言全交給女友籌備，之後會返港擺酒，婚後想先過二人世界。
而Phil的女友Rikko亦有在網上分享幸福，昨日她透過電話表示又驚又喜，透露Phil說了感人說話：「主要講一齊咗咁多年，佢又話自己以前係一舊未雕琢嘅石，但識咗我之後作為男朋友或男人都有進步，聽到呢啲我都眼有淚光。」她亦大讚戒指設計，但不知卡數，估計最少有卡幾，又笑言：「我話佢叻咗好多，以前連美麗大話都唔識講，但依家可以喺我背後搞咁多嘢。」
陳倩揚被老公「禁煮」
至於與Phil同場的陳倩揚則表示平時煮食有響應環保，廚藝了得的她笑言老公叫她不要再煮咁多：「話等佢減咗個肚腩先，不過因為我會幫奇妙電視拍飲食節目，所以要搵佢同家人試味。」她透露活動後會飛到台灣為塑形內衣拍宣傳相，問到可要內衣上陣？她笑言：「唔使。（如果要着你得唔得？）靚就得，媽咪都可以靚同Sexy。」她亦說工作後會留在當地玩兩日，因生完大仔後已有六年未試過一個人去旅行。
文：音樂組
攝：鄭家俊