泳兒趕買「尾班車」慳稅70萬

泳兒學用電動車的叉電插頭，相當投入。

英皇歌手泳兒日前在一男一女陪同下被發現到淺水灣一間車行睇車，期間對一部售價約70多萬的白色電動車情有獨鍾，由車尾箱開始作地氈式研究，又打開車門觀察內櫳及坐入司機位試手感，最後圍着整部車360度睇真啲，揀男友都冇咁嚴格！最後，她與車行職員密斟近十分鐘後坐保母車離開。據知，泳兒有見全數豁免電動車輛的首次登記稅將於本月底完結，以約價值70多萬的電動車計算，若4月1日起購入要多付約一倍車價（合共約140多萬），故她急急決定「上車」慳番筆。

賺千萬人仔拒揮霍

近年泳兒密密吸金，曾有「酒吧后」之稱、齋唱內地酒吧騷的她去年中轉戰商演騷，酬勞有增無減，去年單是唱商演騷已賺近百萬人仔，連其他工作收入吸金近千萬人仔！不過，泳兒未有因成小富婆而變「大花筒」，除了是家庭主要經濟支柱外，母親患病留院亦要預備不時之需，故今次肯花錢買車方便家人也要花得精明。

泳兒曾試另一電動車，試手感勁High！	泳兒睇實車門「飛起」，個樣相當恨買！	泳兒在友人陪同下睇電動車，由頭睇到落尾。

記者昨日向泳兒求證，她承認有意買車：「去車行又睇又買啦！（趕月底前買慳番唔少稅？）係呀！可以慳70幾萬，可以當買樓首期。」她指今次買車除了因早前在英國自駕遊後上癮外，另一原因是為家人：「方便去醫院探媽咪，有部車我可以車爸爸。（可以車出院嘅媽咪？）都係(口架)！」提到去年在內地賺近千萬，泳兒謙虛說：「呢啲公司處理，我唔太清楚。（唔再唱酒吧騷？）係呀！但我唔係唔肯唱，只係公司有呢個安排啫！」她又指在內地唱騷全是辛苦錢：「依家訓練到自己可以當保母車嘅座位係屋企張床，一坐上去就可以瞓得着。」

文：音樂組