田蕊妮拒整心形牛扒 浪漫慳番！
藝人田蕊妮與老公杜汶澤今日出發到北海道滑雪，前晚出席飯局的阿田笑言已老夫老妻，情人節未有大事慶祝，問到會否煮心形牛扒撐枱腳，她竟「投訴」說：「佢氹我都已經係史前嘅事，如果我整（心形牛扒），佢會問我：『好地地點解剪爛佢』囉！」
田蕊妮前晚與鄭嘉穎宴請新劇《迷》台前幕後飯局睇首播，談到今次請食飯，阿田豪氣笑說：「我帶咗酒水嚟，今次其實唔只台前辛苦，幕後都出咗好多力，收視好嘅話食多幾餐都冇所謂。」
「點解剪爛佢？」
談到今日出發到北海道，她開心地說：「係彭浩翔撩嘅，佢依家一年出去滑好多次雪，話45分鐘包教識我，我同老公都係第一次滑咋！（情人節點過？）陪老公剪片。（整心形牛扒？）如果係嘅話，佢會問我好地地點解剪爛佢。（老公畀過驚喜你？）史前嘅事喇，啱啱拍拖時佢試過一口氣準備咗十幾份禮物，包括手鏈、銀包同附屬卡。（依家輪到你畀附屬卡佢？）唔會，我哋經濟獨立。」
嘉穎搞驚喜有分數
至於嘉穎表示對拍檔阿田及監製王心慰有信心，所以相信《迷》收視有保證。談到今次是暫別無綫之作，他說：「唔知幾時再拍，Never Say Never。（情人節慶祝唔到？）佢（陳凱琳）拍緊劇，我要綵排《風雲》5D音樂劇。（現身畀驚喜佢？）我有分數，只要開心日日都係情人節。」他又笑指綵排《風雲》最花時間是練舞：「企喺舞王謝天華身邊好大壓力，佢練幾分鐘，我練幾粒鐘，都冇佢跳得咁好！」
另外，陳凱琳昨日為劇集《平安谷．逐個捉》開工，講到情人節未能與嘉穎慶祝，她說：「睇吓遲一、兩日有冇時間食餐飯，我哋有默契。」
文：影視組