樂印姊妹出道三年終有錢畀家用
組合SiS樂印姊妹將於本月底在九展舉行首個售票音樂會，大玩家姐駱胤樺擅長的accapella（無伴奏合唱），妹妹駱胤鳴則會大顯身手彈琴。出道短短三年就開音樂會，兩人坦言擔心不夠歌：「但公司話呢個機會唔容易，到時會改編人哋啲歌唱。」
提到新人通常第一年攞獎，第二年就較難捱，兩人坦言應驗了「魔咒」：「2015年難捱啲，雖然接咗幾個廣告，但拍晒嘢後都因為一啲意外冇出到。（冇收錢？）少少都有嘅。（蝕錢？）冇，應該係對方蝕，我哋都唔好意思，好似邪住人咁，但2016年就好番，今年年頭就開騷，跨過咗難關。」問到現時收入可有增加？妹妹坦言上月終於交到家用，開心見到努力有回報。