湯洛雯電暈癡心男跪地求愛

情人節單身都唔使怕寂寞，有「模範女友」湯洛雯（靚湯）陪住你！靚湯在今集《區區有女神》中變身愛神打救「癡心男」，推銷自己及幾位是非精姊妹做一日女友，靚湯落力放電兼費盡唇舌，最後全部少男都成為其「裙下之臣」！

笑容甜美、氣質清純的無綫小花湯洛雯是新一集東網巨星節目《區區有女神》主角，靚湯帶大家暢遊其成長地大埔區，更肩負重任，趁情人節將至，慰解Lonely Guy！她笑言：「我變身愛神，介紹女仔畀佢哋識，不過識揀梗係揀我啦！」靚湯拎起貼上六位是非精照片的木板，任單身男挑選一位做女友，若男方都揀選她，任務方為成功！

慰解Lonely Guy

原來靚湯在單身少男界非常受歡迎，頭三位男丁二話不說就揀靚湯做女友，並狂數其優點。「慢熱斯文哥」鍾意靚湯夠溫柔：「啱我口味！」；「黑實仔」就讚靚湯賢良淑德；「癡心男」表示多年前已有留意靚湯，身穿紫衫的他與「紫色姐姐」（靚湯在《學是學非》的角色）夾到爆，最後更跪地送花示愛，氹得靚湯笑逐顏開！

「癡心男」是靚湯忠粉，難得一見女神緊張得腳仔軟。

靚湯為收兵，不惜踢爆好友愛管人。

靚湯嘟嘴自拍，成功收服「斯文哥」。

其後任務冇咁順利，「理性學生哥」起初揀學歷高的黃心穎及麥美恩，靚湯即努力游說：「女友讀書叻會顯得自己冇咁叻o架！揀女友要揀個蠢蠢哋嘅！」而「含蓄仔」則揀李佳芯（Ali）做女友，靚湯說：「你揀Ali唔覺得佢太靚，好冇安全感咩？」之後「含蓄仔」轉揀梁嘉琪，靚湯再「踩」好友說：「嘉琪都好，但感覺似會管住人，你應該揀一個少少靚、少少可愛、又畀到你安全感嘅！」在威逼利誘下，「含蓄仔」大讚靚湯是完美女友模範！最後靚湯成功冧盡全部單身男，任務成功！