楊明炒車 爆菠蘿蓋見骨
無綫藝人楊明昨日拍攝一場外景電單車戲份時，不慎撞向石壆令膝蓋爆開，傷口深至見骨，事後送院救治！其女友莊思明一直陪伴在側，更擔心至眼濕濕。受傷的楊明一度堅持繼續拍攝，獲監製及同劇演員讚有責任心。
楊明昨日在大埔為無綫劇集《心理追兇MIND HUNTER》拍攝一場外景電單車戲份，親身上陣的他甫起步便剷向石壆，膝蓋頓時爆開，傷口深至見骨，傷勢嚴重！現場工作人員見狀即安排他坐下休息，見楊明面色變青，狀甚痛苦，其後由救護車送往大埔那打素醫院急症室診治。
女友傍實照顧
楊明抵達醫院時接受本報記者訪問，被抬下救護車的他說：「冇事！膝頭爆咗！」他的女友莊思明10分鐘後趕到匆匆走入醫院。楊明在病房外等候照X光時指拍攝現場道路太窄，他甫起步便撞上石壆：「自己技術唔好。（平時有揸開？）有時。（傷口好深？）其實我都唔知有幾深……」眼濕濕的思明聞言心痛地說：「不如畀佢抖吓！」又坦言非常擔心男友的傷勢：「梗係擔心！（怪佢唔用替身？）拍嘢都冇辦法，惟有叫佢以後小心啲，我都唔知傷口幾深，唔敢望！」
楊明見過醫生後決定轉往私家醫院就醫，坐輪椅的他說：「醫生話菠蘿蓋啲肉爆開咗，見到骨，但啲骨應該冇事。不過醫生話傷口有啲麻煩，因為膝頭啲肉起晒，要縫針又要安排骨科，我諗住轉去私家搞。（屋企人知情？）家姐知嘅，但父母未知，唔想佢哋擔心。」他轉院期間，思明一直在旁照顧，非常細心。
面青青堅持頂硬上
而事發時亦在現場拍攝的湯鎮業大讚楊明專業：「佢個膝頭爆開咗，好嚴重，好大個窿！後生仔真係搏，出咗事仲話想繼續拍，我話點拍？佢面都青埋，我見到都心噏！」他透露劇集仍未拜神，而現場有一株百年龍眼樹，因枝葉濃密阻礙鏡頭取景而被剪走部分枝葉，似乎不得不迷信！至於監製王偉仁事後受訪，他大讚楊明有責任心，即使受傷仍堅持拍攝。由於已安排拍攝爆破場面，劇組繼續進行餘下的拍攝工作，而楊明有份拍攝的爆破戲則會安排替身頂上。
文：影視組