陳細潔遊日勁食懶理增磅
每年都會外遊滑雪的「鯊魚女」陳細潔（Abbie)，在三月時曾到日本北海道滑雪多次，更順道品嘗美食，Abbie說：「今次只滑咗三日，但食咗好多好嘢，喺小樽買咗好多各類型嘅海鮮，我哋租咗架車，買到成個車尾箱都係，司機都覺得我哋瘋狂，我哋買去打邊爐，又去咗食和牛煲仔飯，係我食過最好食嘅煲仔飯，我平時唔多食飯，嗰日都食咗兩大碗，完全犧牲自己嘅體重。另外又食埋日本火鍋，啲料同湯底又平又靚，有和牛、海膽、吞拿魚腩，冇得頂。」
此外，一向愛杯中物的Abbie，還特別抽時間到威士忌的酒莊，她說：「依家好流行日本威士忌，甜甜哋，好啱女性飲。」Abbie滑雪時更挑戰揸電單車：「原來雪地揸電單車好難，架車又重，同一般陸地好唔同。」
