邵珮詩透底救波 遭梁嘉琪省面
前港姐邵珮詩昨日於活動與排球名將作友誼賽，表現落力的她不惜瞓身「透底」救波，更被隊友梁嘉琪用波省中面，難得伊人仍笑容滿面。同場的岑杏賢對於男友袁偉豪將於新劇拍香艷場面，笑指要待男友苦練一排才能色誘她。
邵珮詩、梁嘉琪、岑杏賢、麥美恩及歐陽巧瑩等昨出席「FIVB世界女排大獎賽-香港2016」活動，期間眾女與中國女排名將孫玥及邱愛華打排球友誼賽，邵珮詩瞓身救波，即使透出內褲也在所不計，又被嘉琪用排球擦到面，但仍笑容滿面，最終由她們一隊勝出。
岑杏賢等仔色誘
輸波的杏賢談到男友袁偉豪將為新劇《三個女人一個「因」》拍攝跳脫衣舞色誘黃智雯戲份，而偉豪早前揚言會找女友為他揀內褲，對此杏賢笑謂：「有時情人節都會送貼身嘢畀佢，所以都有啲品味。（揀少布啲？）佢選香港先生着嗰啲都好貼身，3D喇喎。（畀唔畀佢露？）睇電視尺度，都唔可以太誇張。（畀智雯睇蝕？）唔會，佢選香港先生都畀香港市民睇晒，所以冇特別。（要唔要喺屋企同男友練習？）等佢色誘咗智雯先再返嚟色誘我，所以佢要繼續練吓先。」
麥美恩韓國「整容」
麥美恩則透露稍後將與嘉琪為節目《學是學非》到韓國取景五天，問為何只得二人出發？麥美恩笑說：「我哋最得閒囉！到時會做啲實驗，可能係啪番正啲神經線，又或者啪正番啲輪廓。」
文：影視組