張振朗裸泳激凸 嚇親松松
「出山」拍劇的藝人陳松伶日前與無綫小生張振朗於將軍澳一間酒店拍攝新劇，張振朗搏到盡以肉色短褲上陣拍攝，遠睇似足「全裸」的他下體更「激凸」兼露肥腩！
無綫小生張振朗（Owen）早前扮「Cool魔」張智霖扮到出晒位，人氣上升的他備受力捧，安排於新劇《全職沒女》飾演酒店太子爺，與陳松伶（松松）等拍對手戲。難得有得發圍，Owen把握機會搏到盡，於一幕水中救人戲份豁出去玩「雙凸」，他埋位時僅穿貼身肉色短褲，肥腩凸出，遠睇更似足「全裸」！松松則於池邊為他打氣，他即怕醜用手掩實「小朗」，場面爆笑！當日劇情講述有裸泳習慣的Owen誤會松松遇溺，結果被對方誤會是色魔，更慘被松松揮拳打暈。
「驚走咗啲嘢出嚟」
事後Owen笑言第一次拍「裸露」鏡頭，十分驚青：「好似畀好多對眼非禮。（松松為你打氣？）佢一嗌令我更加驚！」提及驚現肥腩，他說：「之前去馬來西亞食得太多。（事前冇操弗？）專登唔操，仲食大個肚，咁先反高潮！今次大家見我咁肥，下次操咗肌再拍咪見到我嘅努力囉！」又搬於劇集《殭》半裸晒腩的吳業坤做擋箭牌：「佢冇操弗反而深受愛戴，我要抄佢博上位！」提到「凸」出雄風？Owen即強調做足打底措施：「我着咗幾條褲，都驚走咗啲嘢出嚟！」
松松則打趣地笑說：「佢唔會真係全裸，電視尺度都唔得啦！不過如果佢全裸，大家都會好開心！」談到老公知否她要與Owen拍濕身戲？松松即甜笑指老公經常探班，揚言對方是其精神支柱。
文：影視組