林峯完騷唔使禁慾 攬千語食番餐好！
歌手林峯前晚終於完成一連三場紅館《HEART ATTACK LF LIVE IN HK》個唱，事前「禁慾」操肌的林峯完騷後「解禁」，在後台攬實女友吳千語膊頭，戒肥膩食物多時的他又說想「食番餐好啲嘅」。談到他在個唱大騷強勁肌肉，林峯說女友還想他「騷多啲畀人睇」！
林峯的紅館個唱前晚完美落幕，更獲黃百鳴、鍾舒漫、許靖韻、鄧智偉及馬天佑等捧場。林峯早前閉關「禁慾」地獄式操肌，除要女友吳千語暫時「分居」，更要戒口，只食烚菜、烚雞胸等清淡食物。前晚完騷後，林峯即返後台與千語合照，見林峯攬實女友膊頭，終於都「解禁」，不用再「分居」。
「想飲番罐汽水」
前晚林峯繼續以紅色長褸吸血鬼造型躺在透明棺材出場，唱出《Heart Attack》揭開序幕。到中段，畏高的林峯離地近40呎圍繞紅館一周，但沒凌空吊威吔，而他不時提粉絲用電話與他自拍。他扯爆背心半裸示人，唱出《Once Again》時大騷六舊腹肌，令粉絲尖叫。及後他發表感言：「有擔心過唔知會唔會有人嚟睇我演唱會，好感激在場每一位，令我有信心喺舞台上繼續唱歌。」
林峯出席慶功宴時受訪，提到網上流出他在個唱疑似撞到頭的片段，他直言沒受傷：「嗰吓『呯』一聲係急速降落嘅鐵閘聲，冇事。（女友呵番？）好小事。（唔痛？）總算圓滿結束，值得嘅。可能聽日（今日）食番餐好啲嘅囉，呢樣我比較期待。（想食咩？）一陣想飲番罐汽水。」
預告有勁爆工作
問尾場為何沒凌空吊起，林峯坦言因首場後技術上問題，令摩打燒掉：「其實都係創舉，同山頂嘅朋友係最近距離接觸。」而林峯個唱頭場與黎明的騷撞正，他不覺得焦點去了黎明身上，大家都有支持者。問女友千語對演唱會有甚麼評價？他笑言：「佢話騷多啲畀人睇啦。 」他說有勁爆工作接洽中，但未能宣布。
文：專案組
採：音樂組