黎明遇黑幕失靈 金句解圍

天王黎明（Leon）在中環海濱長廊舉行的《黎明LEON 30TH ANNIVERSARY RANDOM LOVE SONGS IN 4D LIVE 2016》演唱會經歷猶如坐過山車般，頭場臨開騷前兩小時因帳篷物料不合英國防火規格，遭食環署拒發牌而被迫取消頭場，Leon經過「一夜折騰」下決定「脫下」包圍場館的帳篷，終獲通過開騷。

不過最意想不到「脫篷」後竟出現一個奇景，經過一連三晚開騷後，場館的「核心外圍」比起「核心內圍」更加愈夜愈有機，尤其是前晚第三場，外圍吸引逾千人聽免費騷！不少情侶及一家大細自備美食佳餚，又啤酒又零食，枱布舖草地即場開「野餐派對」，就連汽車行經時都刻意慢駛，甚至停泊路旁成「車海」，當傳來強勁快歌時，不少人從天窗伸出半個身齊齊「聞歌起舞」。

下次開沙灘騷：早啲申請！

身在台上的Leon對「核心的外圍」亦暸如指掌，他說：「我知道今日好多人泊咗好多車喺度，仲有人野餐添，帶埋紅酒、Parma ham。野餐唔緊要嘅，最緊要係唔好喺度『燒雞翼』，任何同燒有關嘅都唔好啦！相信出面嘅人會聽到我講嘅嘢，自己小心啲，注意安全！總之我哋入面開心，你哋都開心啦！如果阿Sir叫你畀返個空間，咁大家就退一退，一人讓一步。」Leon話中當然有玄機，叫大家勿燒雞翼「生火」，免得為外圍「野餐」聽免費騷而觸犯防火條例！今次新場地「一波幾折」，Leon笑言有意移施去沙灘開騷：「可能我哋下次喺沙灘搞個Unplug演唱會，其實唔係冇可能嘅，不過要早啲申請囉！到時可能有嘢飲、有嘢食，唱吓歌又可以燒嘢食！」講明「早啲申請」，咪唔怕又臨時取消囉！

昨晚第四場，Leon於8時32分開騷，如常先便服現身講幾句：「今日係假期最後一日，但唔緊要，只要呢段時間開心，繼續欣賞個騷就得。」當唱完《中毒的愛情》後播片時，Love區台前的黑色帳幕突然失靈未能上升，Leon即開咪說：「其中一邊帳幕開唔到非常抱歉，我喺中間（台中）唔係出面，我喺出面就可以整到佢。」嘗試播音樂但黑色帳幕仍紋風不動，Leon「執生」朗誦《願你今夜別離去》歌詞，現場歌迷跟着合唱，工作人員隨即「搶救」，有歌迷反慰Leon「唔使急慢慢嚟」，他再次道歉：「發生咁嘅事對唔住，離開咗紅館梗係多呢啲突發事發生。」幸好15分鐘搶修後回復正常，估計因「意外」為免唱到超時，臨時Cut走兩首歌。

今日回復摩天輪抽獎

會上，Leon又點少得講金句：「問你哋簡單問題，聽日返工有乜感受？通常返工第一日刷牙時感覺都好濛瀧，食完早餐就坐交通工具或者揸車，就會諗今日做啲乜，每個人諗嘅嘢唔同，好似呢兩晚走時，同事揸駕黑色Van 2600cc嘅，我就揸駕Mini cooper 1300cc，希望同事唔好揸咁快，咁快冇用，1300cc追2600好難追，所以塞車時最緊要淡定。而累積工作始終要還，錢都要係還，今日冇乜特別嘢同你講喇！」最後於10時32分完場。

另外，因摩天輪周邊有活動舉行，原定開場前Leon與四名歌迷坐摩天輪環節連日被取消，但他昨午在Facebook公布今日可以回復摩天輪抽獎。

文：音樂組