雷怡暉 求愛的女人

雷怡暉（Amanda）擁有混血兒外表，卻說得一口流利廣東話，窈窕淑女的外貌，性格卻爽朗得像個男人，對工作幹勁十足，在九巴工作的15年間，其大膽創新的思維，獲得很高的評價，對愛情同樣勇字當頭，99年下嫁拍拖9年的男友陳鴻輝，婚後兩年即閃離，之後她認識長居大陸的第一任菲律賓籍華僑未婚夫，在麵包與愛情之間，選擇了愛情，毅然放下香港的事業，隨未婚夫到上海定居，她說最初兩年很不習慣，經常上海香港兩邊走，花了2年時間才適應過來，但估不到「安定」不久，便與未婚夫分手，之後遇上第二任台灣籍未婚夫，但最終亦敵不過分手收場，而「巧合地」兩次分手都是因為對方有第三者。

上海浪費10年光陰

Amanda說：「同菲律賓籍華僑未婚夫，喺上海一齊4年冇咗，之後喺上海識咗個台灣人，大家訂咗婚，4年又完咗，加埋初頭嗰2年，前後喺上海住咗10年，我啲朋友話我浪費咗10年，戥我唔抵，我自己就睇化咗，當初跟佢（第一任未婚夫）去上海呢個動作，我係好珍惜，10年前冇去上海，唔會有呢個經歷，依家目標係追求開心。（分手係有第三者？）係，兩次，過去唔好提，喺上海我係好認真對待感情，唔開心嘅嘢，我會洗咗佢，好似電腦按個delete掣。」

雷怡暉	雷怡暉為追求愛情，甘願離開香港到人地生疏的上海生活，而且一住十年，這份堅持，十分難得。	回復單身的雷怡暉，笑言一直有追求者。

擇偶條件首要專一

曾經歷兩次小三介入，現在她的擇偶條件，首要是專一，但她說專一的男人很難求：「其實美國、澳洲一帶好流行partner關係，一對男女，可能佢哋分別都有經歷，離過婚又有子女，兩個人想有個伴一齊生活，選擇唔結婚仲開心，（Partnership關係適合你嗎？）冇諗咁多，先搵吓適合嘅人先，睇吓可唔可以雙方包容，如果佢想結婚，我就會結。（好就得人？）呢個都係我弱點，畀人食住，哈哈！如果好鍾意佢，就會配合佢，由佢決定晒。」

女強人一旦戀愛，便變成小鳥依人，是弱點嗎？或者在男人眼中是優點呢！事實上，Amanda跟過往的前度，雖然緣分已盡，但分手再見亦是朋友，像15歲的初戀男友，如今已升呢成為她的「閨蜜」，經常跟她分享感情煩惱事。

唔怕失敗追求浪漫

曾嘗過離婚及訂婚失敗，Amanda給自己的結論是：「失敗唔怕，我係雙魚座，追求浪漫。」現在回復單身，笑言一直有追求者，現在的心態是會更加愛錫自己，她說：「女仔開心自然會靚，有正能量，係一種魅力，唔止吸引男人，係會吸引人想同你傾偈，開心嘅話，做嘢都有幹勁啲，好鍾意依家公關嘅工作，返嚟香港之後好多朋友未見，所以都未決定係咪咁快拍拖。」她說自己樂觀的個性最像媽媽。

上海的10年，她並非只有失，也有得，最大的得着是她學會一口流利普通話，當時她為了加快融入上海的生活，到上海交通大學學普通話，又請私人教授雙管齊下，在上海失戀期間，她在當地開過公關公司，故去年回港，有不少朋友主動跟她合作做公關，最後決定與現時的公關公司拍檔合作，她讚外籍拍檔跟她一樣是幹勁型女性，而且亦是大笑姑婆，跟她很夾得來。

Profile

中文名：雷怡暉

英文名：Amanda

家族：九巴創辦人雷亮的後人，父親雷普照，母親澳洲籍，雷怡暉有兩弟，其中雷永晃早年亦是社交界的常客。

現職：PRIME公關公司總經理

採訪：Tracy Leung

攝影：劉智源

場地：ClubONE Repulse Bay