盛君乘「姓」追擊尋根究柢
黃百鳴力捧新人盛君（Janelle）最近忙個不停，除了拍電影外又進軍樂壇，第一首歌已正式面世，新碟計劃年底推出，此外會拍攝大型記錄片《萬家姓》，走訪世界各地。盛君珍惜每個機會，還勇於挑戰自己，向來愛探究歷史，當知要拍《萬家姓》時，十分雀躍，對於會揭開「姓」的起源、「氏」的由來，甚至到墓園了解當地華僑的保留傳統，還有採訪當地宗親會，Janelle在製作過程中感受到海內外同胞永遠根連根、心連心，尋找華人心中的故鄉，是新歷史探索。
以為沉悶 其實勁有趣
究竟每個人對自己祖先、甚至祖宗有幾多認識？究竟每個家族傳統文化同習俗又保留幾多？一出生就跟爸爸姓係必然事，然而我覺得每個姓氏背後都隱藏着一段歷史同世世代代嘅家族血緣關係。聽落好似好悶，但實際好有趣味性。我讀書時對中史同西史科都好有興趣，啲人成日覺得歷史就等於悶，好抗拒，但我唔明點解大家唔換另一種角度去睇歷史書？如果當係一本故書事或長篇小說，會唔會更有趣味性？更有意欲再追睇落去呢？
其實每個中國人都有自己嘅姓氏，姓氏同人名串埋就會得出一個人嘅姓名，姓氏係表示每個家族血緣關係嘅標誌同符號，既然大家都有名有姓，點解唔去了解自己多啲？可能了解同探索過後，會發現另一個自己，又或者發現鮮為人知嘅秘密，哈哈。
拒做花瓶 定時做功課
我唔知整個紀錄片要拍幾耐，但我唔會放棄拍攝工作，盡量喺檔期上遷就。我依家一得閒，就會做定功課，喺屋企上網搵相關資料，甚至去圖書館睇有關書籍。我唔想到時一味死背稿，如果拍攝前先強化自己，增進自己有關方面知識，拍攝過程會更流暢。有幸拍攝呢部大型紀錄片，我要更加畀心機做到最好，唔想被人當自己係花瓶，而係有埋內涵，今次拍攝工作對我嚟講係一個大突破。
獲益良多 富教育意義
我有份參與拍攝《萬家姓》真係好開心，好有教育意義，作為華人既可以去探索每個姓氏背後嘅歷史，令我獲益良多，人就係要不斷學習同了解。呢個係好大型嘅製作，需要花好長嘅時間進行拍攝。依家只係走訪咗幾個中國城市，到訪中國嘅河南省同山西省外，之後仲會到台灣嘅台北同高雄、馬來西亞嘅吉隆坡、菲律賓嘅馬尼拉，甚至衝出亞洲，遠赴加拿大嘅溫哥華與多倫多、英國倫敦同法國巴黎等。我哋到每一個地點都會拍攝墓園，同採訪當地的宗親會，了解當地華僑的保留傳統嘅情況。
後記：因有自信 所以美麗
記得第一次與盛君做訪問，她表現害羞，偏文靜卻愛笑。如今第二次訪問，竟給我有一種脫胎換骨的感覺，健談了許多，思想亦變得成熟。與盛君詳談下，便得知原因很簡單，就是自信。畢竟她隻身來港發展娛樂事業，言語遇到最大障礙，就算玩鴕鳥政策都只是治標不治本，如其逃避，倒不如學識面對與接受。站在面前的Janelle很有自信光彩，亦為她帶來星味。
文：名人組
化妝：Chris Lam
髮型：Joe Yau（銅鑼灣）
場地：Manzo Italian Steak House（銅鑼灣）