關詠荷激發母愛擔遮追女
現年50歲的關詠荷日前帶同9歲的愛女張童（Brittany）往便利店買零食，活潑好動的Brittany如甩繩馬騮，待媽媽付錢後即跑出店外，擔心女兒安全又怕她被淋濕，關詠荷無奈地撐住雨傘當街追女。
曾是無綫當家花旦之一的關詠荷，與丈夫張家輝結婚以來一直恩愛不減，自從為丈夫誕下女兒Brittany後關詠荷事事以家庭為先，不惜減少參與幕前演出，專心相夫教女，而Brittany亦不經不覺經已9歲，長得手長腳長，並遺傳了媽媽的眉清目秀，樣子愈大愈可愛。
入便利店掃零食
日前下午4時多，一身便服打扮的關詠荷帶同穿上運動服、似剛放學的女兒Brittany雙雙現身中環，兩母女有傾有講地步入便利店，正值發育時期的女兒嚷着要買零食醫肚，入到店內專向朱古力、薯片等零食埋手，此時關詠荷也戴上眼鏡幫女兒揀埋一份，未幾已挑選了一堆戰利品，兩母女齊齊去排隊付款。
邊嗌邊跑超緊張
由於當日正值下雨天，活潑的Brittany待媽媽付完錢後步出店外興奮地冒雨奔跑，護女心切的關詠荷為免女兒衝出馬路，又擔心她濕身病倒，不惜放下形象，撐住雨傘當街邊嗌邊追女，Brittany聽見媽媽指令，乖巧地放慢腳步，此時關詠荷立即上前攬實個女齊齊上車，由司機接載回家，十分溫馨。
文、攝：追蹤組