佘詩曼力爭大滿貫 子珊攔路
佘詩曼早前強勢回歸無綫，頭炮孭飛劇叫好叫座，更橫掃星馬兩地視后獎。明睌舉行的無綫頒獎禮被視為終極戰，據無綫現時投票五強走勢，阿佘企硬榜首位置，十拿九穩成為大滿貫視后。不過阿佘認為意料中也會有喜出望外一刻，故不敢多想，反而獲一齊爭獎的師妹徐子珊則撐到行，大讚阿佘演技冇得頂，故會把自己一票投給對方。而五強走勢當中，演齡尚淺的王菀之竟能躋身第4位，令人意外！
兩年沒有作品的佘詩曼於劇集《使徒行者》演臥底「釘姐」一角，憑揮灑自如演技，尤其戲中三位母親先後離世時情景，她以不同層次演繹傷心程度，成功觸動觀眾神經。早前阿佘先拔頭籌，分別獲得《星和無綫電視大獎》及《TVB馬來西亞星光薈萃頒獎典禮2014》視后寶座，可謂氣勢如虹，同時阿佘亦成為明睌舉行的《無綫萬千星輝頒獎典禮2014》候選視后頂頭大熱。
王菀之排第4位
根據無綫內部資料顯示，截至昨日為止，視后五強走勢分別是佘詩曼位列榜首，其後便是田蕊妮、鍾嘉欣、王菀之及徐子珊。排行榜中令人意外的是排第4位的王菀之，歌手出身的她雖然戲齡短，但於《老表，你好hea！》內卻能放下偶像包袱，以爛撻撻形象演活歌手「林雪」一角，故成功吸納一班電視擁躉票數。
位列榜首的阿佘，正當外間認為她根本冇得輸之際，她卻有點保留。她謂：「邊有攞硬呢樣嘢？頒獎禮從來都係咁，可能有意料之中，亦有喜出望外一刻，就好似舊年都令人好緊張，所以平常心。（咁想唔想攞？）都想，試過好多次，參加比賽個個都想贏或者有獎攞。」阿佘坦言信心來自星馬獎項，認為世間沒有不勞而獲，每個演員均付出很大努力，吃了不少苦頭才走到今天，自言拍攝時心理及生理上也用了很多力。問到是否對角色很有信心？她笑謂：「以前試過外地攞過之後香港冇，咩類型組合都有，經過咁多年訓練，唔會畀太大壓力自己，攞到就係好禮物，我又冇乜壓力，因為拍緊套電影，可以分散壓力。」
獎項唔可以強求
而子珊則憑劇集《再戰明天》上戰場，同樣地對視后獎抱平常心。她謂：「我對個角色有信心，不過獎項呢啲嘢唔可以強求，亦唔係我終極目標，人生都仲有好多嘢追求嘅！當然有就梗係開心。」談到心水視后，子珊二話不說表示投硬阿佘，坦言有留意對方競逐的作品，大讚師姐把角色拿捏得恰到好處：「都聽好多人講佢做得好好，我睇咗都好認同，所以梗係投阿佘啦！」
佘詩曼
熱爆指數：5星
提名劇集：《使徒行者》
入行年資：17年
代表作：《十月初五的月光》、《金枝慾孽》、《宮心計》、《鳳凰四重奏》等
簡評：多年來飾演的角色多元化，可塑性甚高，演活潑時夠佻脫，演巴辣時夠倀雞。2006年以《鳳凰四重奏》四個年代的四個角色勇奪視后，演技早獲認同。
徐子珊
熱爆指數：1星
提名劇集：《再戰明天》
入行年資：10年
代表作：《潛行狙擊》、《雷霆掃毒》、《法證先鋒3》、《My盛Lady》等。
簡評：曾歌影視三棲發展，早前於電影《跟蹤》中已備受好評，但始終專注電視圈，近年更被力捧成多劇女主角，於《再戰明天》中與吳啟華譜忘年戀。
文：影視組
攝影：吳文聰
場地：都會海逸酒店
服妝：Cecilia Yau Couture
佘詩曼化妝：Katherine Lo
徐子珊化妝：Raymond Yip
髮型：Maggiefannie @ LA biosthetique