秋生恨添食 時裝喜劇通殺
影帝黃秋生昨日偕黎耀祥、馬國明等現身台慶劇《梟雄》宣傳，劇集收視及網上點擊率成績不俗，劇中演上海大亨的秋生也直呼過癮想再拍劇，又謂時裝、喜劇「乜都得」！馬國明則恨拍《梟雄》前傳，陳煒揚言如再與馬國明合作，性感尺度可去得更盡！
黃秋生昨率領黎耀祥、蘇玉華、陳煒及馬國明等出席台慶劇《梟雄》「舞鬥百樂門」活動，席間以劇中懷舊造型現身的演員們輪流上台跳社交舞，秋生先後與蘇玉華、陳煒攬腰跳華爾茲；自稱舞男的祥仔則反串大擺「姣樣」腳箝馬國明，並說：「箝得好舒服，佢係筍盤。」
怕洪永城惹禍
《梟雄》上周平均收視25點，最高27.3點，對此祥仔說：「網上點擊率40、50萬都好高，依家生活習慣變咗，傳統收視25、26點都唔差，但唔會好似以前突破30、40點，所以計埋點擊率都差唔多。」秋生則表示反應不俗：「出街啲姐姐、年紀大嘅父母都話霸住睇電視，大家努力係有成果。（讚你做得好？）多謝，心都定啲。（拎視帝？）唔敢當。」他又直呼過癮想再拍劇：「大家合作好開心，日日都嘻嘻哈哈。（想同邊個合作？）依家呢班幾好，拍時裝梗好啦，舒服啲，喜劇都好，我乜都得。」
談到「神戲班」學生蔡思貝的學歷遭質疑，秋生力撐她為人誠實，更認為她不會坐監：「件事係點都未知，畀機會佢整理、解釋，或者係誤會。如果呃呢啲嘢做特首、教授就有問題，但如果呃呢啲做侍應冇乜所謂。」
對於巴黎恐襲，秋生稱不應向惡勢力低頭：「咁係同全人類挑戰，如果各國唔齊手合作停止，再搞落去核武就不得了。」問洪永城網上發文「KILL ISIS」，會否擔心其人身安全？他笑謂也擔心，因為用英文寫較危險。
陳煒冧馬國明
另外，陳煒在《梟雄》大露背又跟馬國明咀嘴，馬國明昨大嗌陳煒好正兼好咀，陳煒自爆戲外不斷遭馬國明調戲，被指露得少的她又承諾：「下次露多啲囉！（去到幾盡？）係馬國明就幾盡都得！」馬國明回應道：「快啲叫公司開套畀我哋，我有興趣拍《梟雄》前傳。（去到幾盡？）可以比陳煒更盡！」
文：影視組