黃子雄拖女友 波士變阿四
平時演慣「波士」角色的黃子雄，在幕前經常擺出波士款，日前他與女友夏竹欣拍拖到中環購物，化身溫柔男朋友，全程與女友十指緊扣晒恩愛，還甘做「阿四」為女友拿戰利品！反觀比較大男人的詹瑞文，與女友Amenda拍拖行街，全程各有各行，十分生疏。
黃子雄在無綫處境劇《愛．回家》中飾演律師行老闆，經常吩咐下屬工作，擺出一副威嚴的老闆姿態。原來現實中的子雄，卻是個任勞任怨的溫柔男朋友。日前下午5時許，身穿便服的子雄，與奀星女友夏竹欣拍拖到中環行街，沿途見兩人十指緊扣，子雄更細心為女友孭住大布袋，邊行邊傾，認真sweet！
有商有量有風度
未幾雙雙進入附近一間名店，甫進店內，兩人即分頭行事，子雄往睇皮鞋，竹欣則往睇手袋，當睇中心頭好時，兩人又走埋有商有量，互相給予意見。逗留約半小時，見子雄手持大袋戰利品步出，並有風度地為女友開門，見到記者拍照，做「阿四」的子雄仍keep住親切笑容望鏡示好，問到是否買禮物給女友？他笑笑口表示：「我哋比較自私，自己買畀自己。」而竹欣見男友做苦力，亦於心不忍，自己孭回布袋，其後二人轉到附近繼續行街。
木木獨獨冇表情
另邊廂，詹瑞文（詹sir）日前與女友Amenda現身西九一個商場行街，相比子雄，詹sir較大男人得多，見他與女友各有各行，期間還木無表情，女友看似十分冇癮。
期間見詹sir到該處戲院購買戲飛後，再步往附近一間餐廳，找男友人交換戲飛，在交收戲飛一刻，一直冇表情的詹sir才露出笑容，之後與女友前後腳入場睇戲，看兩人的表現，生疏過普通朋友呢！
文、攝：追蹤組