張繼聰咀王菀之避諗老婆

藝人王祖藍、王菀之、張繼聰等人，前晚出席無綫劇集《老表，你好hea！》於商場舉行的直播大結局活動。問到在張繼聰及王菀之在結局中狂咀戲份有否尷尬？王菀之自爆咀戲拍咗好耐，因導演一直唔嗌cut，她說：「不過我哋好熟，會度埋最靚嘅角度先拍！」而張繼聰則直指咀戲「濕濕碎」：「期間諗吓其他嘢，諗吓佢（菀之）幾時出碟。（唔諗老婆？）老婆就成日諗嘅，但拍緊時諗就驚走咗戲！」