柏豪爆肌辣身舞玩驚喜

唔敢着魚網衫

柏豪為了處男紅館騷操得一身肌肉，他說：「希望喺台上有自信，腹肌、人魚線一套過練，咩線都齊！」又話本來出席記招打算只穿一件魚網衫，但覺得「仲未係時候」，還要繼續加把勁操fit！柏豪亦透露正為辣身舞拍檔傷腦筋，問到會否請緋聞女友吳雨霏、連詩雅幫忙，他又覺得經常和兩人合作，欠奉新鮮感，他說：「最緊要有驚喜！」

請偶像做嘉賓

有傳近期演唱會門票市道不佳，但柏豪演唱會優先門票卻一小時售罄，他謂：「多謝婆婆保佑！」提到歌衫，柏豪搞笑話衫size會愈來愈大，因為正努力爆肌。問到是否好少布？柏豪笑言：「要着多啲衫先有得除！」至於嘉賓方面，柏豪預告會邀請自己的偶像當嘉賓，希望夢想成真，問到圈外女友可會捧場？他表示：「因為今次係第一次喺紅館開個唱，希望所有朋友都會嚟捧場，唔嚟唔係朋友！」

文：音樂組