杜宇航百萬贖身分期還
杜宇航與師傅冼國林及經理人公司「和平分手」。冼師傅召開記者會交代詳情，透露杜宇航以七位數賠償換回自由，由於擔心其經濟，冼師傅繼續「放生」，讓他一年內分期還清。冼師傅又寄語對方要帶眼識人，日後不要再走歪路。
杜宇航與冼國林關係鬧僵後，前者一度發律師信不滿經理人公司代為推工作，影響生計，又入稟向公司追討216萬，結果在法律界高人指點下，終撤銷入稟申請兼登報向冼師傅道歉。冼師傅昨於辦公室召開記者會，交代解約詳情。他透露杜宇航最終賠償七位數字，提早五年與公司結束賓主關係：「我不嬲都想畀路佢行，都知道佢經濟問題，所以同意畀佢一年內分期繳清。（接受佢道歉？）所有嘢都要睇耐啲，現階段我覺得佢係有誠意嘅。我同自己講，要相信佢畀人誤導，如果唔係冇理由原諒佢。」他事後接受電話訪問補充，寄語杜宇航日後要努力工作：「真係要帶眼識人。我亦呼籲真心愛佢嘅人，要為佢諗清楚，畀佢嘅意見，究竟係為佢好，定係害咗佢。」
兩年前已決裂
被問到會否與杜宇航繼續師徒關係時，冼師傅表示：「其實兩年前，佢已經唔係我徒弟，我顧佢聲譽，所以冇對外宣布。係人都可以叫我師傅，尊稱嚟啫。（其他徒弟又有冇走歪路？）我唔敢答，今日唔知聽日事嘛！」對於杜宇航對經理人公司代推工作的指控，冼師傅不禁謂：「我唔知佢喺邊度聽番嚟，話廣電總局搵佢拍戲，廣電局點會開戲呀？反而佢堅持唔接嘅job，我哋有根有據，佢令公司損失咗一百幾十萬，我都冇追究，佢又嚟話公司欠佢錢，公司上咗市，咁對公司影響好大。」
另外，同樣是習武之人的沈震軒前晚出席公開活動，對杜、冼事件表示不知情，但希望事件能和平解決，以和為貴。
文：影視組