黃心穎失落 自薦下屆出征

黃心穎、鄧佩儀和梁烈唯等前晚現身電視城，出席《決賽森巴嘉年華》節目。隨着德國捧走大力神盃，世界盃4年後俄羅斯再見，心穎高呼不捨，她說：「我好失落！我慣咗夜瞓，嚟緊夜晚冇人陪我傾偈，又要等4年，4年後我都快30歲！我好想一生人起碼親身去一次現場睇世界盃，下屆俄羅斯我好想去！想同公司自薦定先！（唔怕被熱情球迷強吻？）唔怕！到時我用拗腰頭槌化解，又或者到時係我更熱情呢！」

鄧佩儀差點被咀

有幸親赴巴西採訪世盃的鄧佩儀，昨在電話說：「好唔捨得，冇波睇嘅日子，我會睇番之前喺巴西採訪時影落嘅相，回憶同緬懷一下。」她又透露差點被球迷咀嘴，她說：「之前喺巴西採訪阿根廷對荷蘭場波，有個上身冇着衫嘅球迷好興奮，捉住我想錫落我個嘴度，好在身旁男同事幫我解圍。（嚇驚咗？）我諗佢係興奮球隊晉級，我冇驚，仲想公司下屆都搵我去俄羅斯！」

鄧佩儀到巴西採訪時，差點被球迷咀嘴。	德國擁躉梁烈唯（左三）與何傲兒（右一）均對德國奪冠感興奮。	馬國明表示世界盃完結，更能夠專心拍劇。

力撐德國捧盃的梁烈唯，昨在電話說：「慣咗有波睇成個月，依家冇，我夜晚惟有改睇戲。（點調校生理時鐘？）我之前有啲波都係瞌住眼瞓睇，醒咗再睇精華，所以唔使點調校，夜晚可以隨時瞓得着！」

馬國明專心拍劇

「波牛」馬國明昨日透過電話訪問表示：「我之前都唔係場場睇，睇咗好幾場賽事咁啦，世盃完咗都冇大問題，我都一樣係咁專心拍劇，因為我係拍劇優先，睇波只係有時間至睇！」

美斯迷蔡卓妍則說：「終於可以早瞓，淘汰賽好夜開波，唔精彩嘅話真係好慘！不過今屆總括都好睇嘅！德國都實至名歸，希望4年後我可以飛俄羅斯睇波啦！」

文：影視組