當街喝罵Sean婷婷：玩緊扮嬲
謝婷婷早前被本報拍得在蘭桂坊對男友Sean黑面，還當街大聲怒罵男友，昨日她出席Glasstique舉行的Karen Walker 2014春夏眼鏡系列傳媒預覽活動，談及有關報道時說：「嗰晚我哋同朋友慶祝生日，應該係扮嬲，係好cute嗰隻。（你嗲佢？）類似啦。（扭計？）扭計都唔係，係玩。（你平時都成日嗲佢？）OK啦。」她說沒有試過當街罵男友或發脾氣，Sean亦沒有激嬲她。
兩人相處可有試過意見不合？婷婷說：「我同佢關係好特別，我哋冇芥蒂，唔會好情緒化咁同對方講嘢，係有傾有講有商量。」又自言沒有公主病。以前拍拖亦很少當街罵男友，她的性格是發嬲時不出聲。婷婷又大讚男友sweet、溫柔、好脾氣又有修養，甚麼都會向好的方面諗，還會多謝給他意見。
