張智霖認有壓力：運動化解
演得又唱得的張智霖（Chilam）近年人氣勁升，工作壓力終爆煲，疑患焦慮症，日前被《好報》拍得他速試全港暫只有一部、價值450萬港幣的法拉利，更立刻扑錘據為己有，瘋狂揈錢作減壓！昨日Chilam自言遇壓力會以運動化解，現他正集中火力為個唱鍛煉體魄，屆時將以立體視覺效果為主題，還籲粉絲撲飛要快手；對於被拍得豪買辣跑，他更直言男士也愛跑車！
大細路張智霖（Chilam）向來喜歡買跑車當「玩具」，由於工作不斷令荷包腫脹，即使數百萬一部辣跑也絕對應付有餘。不過他正為7月紅館個唱準備，加上簽下多部片約，實在忙到喘不過氣，事業心重的Chilam更親力親為，連個唱的流程也要參與，緊張得一返家便匿埋度橋，還試過半夜三更致電工作人員作修改，認真誇張。
單拖試車享受極速
結果Chilam在種種壓力下終爆煲，近日疑患上焦慮症，為宣洩壓力，他一擲450萬買入全港暫時只有一部的法拉利458 Speciale辣跑，日前《好報》更直擊他單拖到銅鑼灣試車，揸慣靚車的Chilam對全車上下也細心研究，還不停詢問經紀問題，及後更親身坐上司機位撻匙，隨即踩住油門絕塵而去，享受極速的快感！
對於疑患焦慮症，Chilam昨日接受本報電話訪問時笑謂：「我依家非常之歡樂，喺工作壓力下，我係會做好多運動去化解，我冇咩事，依家都做緊運動啦！（老婆有冇哦你買車？）冇啦！男仔係鍾意呢啲，女仔就鍾意第二啲嘢。」談到如此大手筆買車，Chilam自言貴與否要視乎個人情況，問到是否綽綽有餘？他笑謂：「唔好講呢啲啦！」
「立體」演唱會諗爆頭
Chilam又透露現時每日也為演唱會開會：「我想投入感大啲，今次玩立體視覺效果，所以全部流程我都會參與，賣飛情況都幾理想，可惜嘅係同紅館申請咗兩次都加唔到場，唔可以畀更多觀眾欣賞到咁好嘅製作。（開part 2？）試過申請其他月份，但今年都爆晒，明年我都有幾部電影，所以呢兩年喺香港應該都開唔到住，所以想睇嘅觀眾快啲去買飛啦！得番少少門票咋。」
文：影視組