官恩娜淪為狗奴夜半執金
女神變女傭，執「金」執到頭都痛！官恩娜（Ella）昨日出席「職安校園電台節目創作比賽啟動禮」暨「2014年榮譽職安健大使委任禮」時，自爆一向打理家務的女傭突然辭職，殺她一個措手不及：「我依家一個人打兩份工，每日放工要洗碗、抹地，仲要照顧隻狗。」平時被服侍慣的Ella今次要紆尊降貴，為愛犬執便便：「尋晚（前晚）錄音錄到好夜，返到屋企先知隻狗肚屙，我第一時間要執大小二便，執咗成晚。」但屬愛犬族的她揚言會犧牲休息時間照顧狗仔。
興奮再當Sam嘉賓
正式被委任為「榮譽職安健大使」的Ella表示初入行時曾擔任許冠傑（Sam）演唱會的嘉賓，豈料中途險生意外：「因為個舞台好多機關，我差啲跌落一個幾米深嘅窿，好彩Sam即刻一手捉住我。」事隔近十年後，即將在紅館開騷的Sam再度邀請Ella做嘉賓，令她大感興奮，她更提醒一眾女星提防走光也是職安健的其中一環。
同場的陳明恩表示工作經驗不多，但數到最危險一次則是高空跳舞：「嗰次要扮地盤工人唱歌跳舞，要喺鐵架上跣落嚟，好刺激，覺得自己好似一個消防員。」她表示將在四月開拍《老表，你好Hea﹗》，三月中將會試造型：「我知道今次會同王祖藍會多咗對手戲，當然好希望飾演情侶。」
文：音樂組