吳卓羲攬梁靖琪:我唔尷尬

有傳梁靖琪(Toby)離婚,是因她與吳卓羲傳出緋聞,前晚Toby與吳卓羲雙雙出席活動,二人齊聲強調是好友兼兄妹關係。合照時,Toby不介意被吳卓羲攬腰,其玉手更搭在男方的胸膛上,甚有默契,不過吳卓羲揚言:「係觀眾覺得我哋會尷尬,但我唔會。」

Toby被爆離婚後前晚首次出席公開活動,同場還有莊思敏、周柏豪、連詩雅等,而與Toby傳出緋聞甚至被指是離婚導火線的吳卓羲亦有到場。

首先到場的Toby做完訪問後,剛巧吳卓羲座駕亦抵達,Toby應記者要求等男方落車合照,惟吳卓羲卻未有落車,Toby笑說:「你再唔落嚟,我走喇!」而吳卓羲待對方返回場內才落車,做完訪問後亦應記者要求大方跟Toby合照,還輕輕攬着伊人纖腰,女方亦識做的將手放在男方胸膛上。

私下成日見面

問到Toby與吳卓羲同場會否尷尬?她說:「唔會,好朋友啫點會尷尬,(傳佢導致你離婚?)講過唔關佢事,真係好朋友。(你哋有冇聯絡?)得閒有聯絡,公司見面或者Party,好似我爹哋之前個Party。」她表示失婚後心情已平復,現努力工作和健身,不過仍未Ready新戀情,問到離婚可留有陰影?她坦言:「冇就假嘅,要慢慢調節自己心情。(考慮吳卓羲?)朋友永遠都係朋友。」

至於入場前不肯落車跟Toby合照,吳卓羲解釋說:「大會安排逐個逐個落嚟影相,唔關我事。(你介意同Toby合照?)唔會介意,我哋係朋友嚟,係大會叫我喺車度等,我哋都見咗好多次,佢爹哋退休個Party都有見。」他又強調無追求對方,二人由細識到大,是好友關係:「佢嗌我哥哥,每年工作以外都會見好多次。(太好朋友令佢前夫呷醋?)咁好多人都可以惹人呷醋,林峯、郭政鴻都得,唔係小朋友,又唔係有事發生。」

吳卓羲亦否認導致Toby離婚,問事件會否令兩人尷尬?他說:「係觀眾覺得我哋會尷尬,我唔會,唔好用尷尬呢兩個字形容我同Toby嘅關係。」他又表示二人不會為此而避忌。

緋聞傳足8年

早前梁靖琪被傳與黃敏豪離婚,是因為吳卓羲介入,其實梁靖琪與吳卓羲早在2006年時已傳過緋聞,當年他們合演無綫劇《男人之苦》飾兩公婆,男方更奪下梁靖琪的螢幕初吻,繼而兩人開始傳出緋聞。到2012年他們再為《衝上雲霄II》到海南島拍攝外景,二人的緋聞再成為熱話,有傳此事為她離婚的導火線。

文:名人組