徐靖雯模心戀戰 影圈求變
近年很多電視台花旦小生北上發展，因為內地片酬高兼且待遇好，反之亦有很多內地模特兒來港發展，成功例子有熊黛林，因「城嫂」之名，令工作量及知名度大增。曾與無綫小生鄭嘉穎扯上關係的內地姑娘徐靖雯（Jenny），卻沒有因此而上位，甚至抗拒靠花邊新聞見報，而事業大過天的她自言做model已一段時間覺得無聊，希望殺入影圈，拚出一番成績！
愛情如賭博
對Jenny來說，愛情的吸引之處在於它像一場賭博，正因為「今日唔知聽日事」，所以她從不願意把「男朋友」三個字掛在嘴邊，她甚至覺得一日未結婚，兩人關係都是不穩定的，故雖與周子揚拍拖兩年，但她仍把愛情排在事業和家庭之後。
愛情之所以咁吸引大家，因為唔知會發生咩事，就好似賭博遊戲，點揀好呢？落唔落注呢？我細個擺好多注意喺愛情上，依家覺得平衡得好好，可能年紀大咗，識點平衡，自己調整得幾好，幾開心o架！
未搵到結婚對象
嚟到香港識多啲朋友先唔悶，年紀大嘅朋友識好多嘢，年紀細嘅就令我好似年輕咗。如果要將愛情、事業、家庭、朋友排位，呢刻事業第一，我覺得自己幾唔孝順，每年都會帶父母去旅行，但冇乜時間陪佢哋，將來會放家人第一。
不過我份人唔係特別想講感情事，如果我搵到一個啱嘅結婚對象我就會講，但未搵到，我覺得未到結婚嗰刻，感情都唔算穩定。現階段專注事業，結婚後我就會大講特講，拍拖唔需要向大家交代，唔想靠花邊新聞上報，覺得好無聊。
轉型入影圈
Jenny眼見香港市場愈來愈細，很多同行也相繼轉型當主持、拍戲等等，Jenny直言也想轉型拍戲，因為模特兒工作一直重複，開始覺得無聊，想殺入影圈的她卻又抗拒走性感路線，希望走出一條屬於自己的道路。
我係一個冇乜計劃嘅人，但我鍾意做嘢，結咗婚我都要做嘢，但呢幾年冇計劃結婚，都係做嘢先，女人一定要有自己追求，唔理你搵幾多錢，起碼有精神滿足。其實我唔係好成熟嘅女仔，工作亦唔耐，第一份工就係做model，係朋友介紹入行，大學時已經拍廣告。
拒學湯唯裸上位
嚟咗香港兩三年，幾慣o架，覺得做每件事都要堅持，我幾鍾意香港，但係呢度model market唔係特別好，好多大騷去咗內地，大品牌第一站發布會揀北京或上海，香港做model要長久啲就要多方面發展，例如主持、拍戲。前一年已經拍咗電影，我想向呢方面發展。做model耐咗有啲無聊，已經習慣咗呢個方式，所以都想轉型，想學演技。
我可以放低靚女形象演戲，但唔會性感，我有好多角色都想做，重點係有發揮空間，但唔會效法湯唯拍裸露戲，呢刻做唔到。唔係屋企人或者另一半畀壓力，冇乜人可以左右到自己點揀，但唔係個個演員出嚟都係呢條路，想行番一條屬於自己嘅路，因為每個人機緣唔同。
夠靚拒整容
時下很多女星樣子活像倒模，全拜整容科技愈趨發達所賜，Jenny也曾被質疑「變臉」，但她自言怕痛，所以不會整容。
細個唔覺得自己靚同高大，但聽到人咁講我，佢哋話：「你咁高呀？」我就覺得自己個樣可以再好啲啦，仲有好大進步空間，不過以往嘅男朋友都唔鍾意讚我，話我已經幾有信心，再讚我嘅話，驚我自我感覺會太好。
其實我覺得除非好醜樣，搵唔到老公、工作，本身個樣幾靚就唔需要，同埋整容好痛，我剝牙都覺得好痛，承受唔到，我冇勇氣。
後記：堅持低調
Jenny外表斯文柔弱，其實她是一個頗堅持的女生，相約做專訪，亦開宗明義不會多談感情事，這份堅持不靠私生活見報的決心，相信令很多人費解，心想又不是80年代，哪有明星不能談戀愛的規條？反正Jenny就是要堅持，其實在某層面上是值得欣賞的，畢竟堅持己見的人不多了。
口述：徐靖雯
筆錄：李惠儀
攝影：秦健輝
場地：Ghost Cafe
服裝：bread n butter